Ruth 4
1 波阿斯到城門口眾人聚集个地方，坐在該位。恁堵好，波阿斯所講个至親，有義務照顧厥家族該儕，對該位經過。波阿斯就喊佢个名講：「請過來這位坐。」佢就過來坐。
2 波阿斯又對城肚請出十位長老來，請佢等在該位坐下來。大家全部坐好勢。
3 佢對該至親講：「拿娥美對摩押轉來，姖愛賣𠊎等親族以利米勒該垤田；
4 𠊎想你應該知這件事。若係你愛買轉去，就愛在這兜坐等个人㧯𫣆等个長老面前來買；若係毋買，請講清楚，因為你有優先權，接等正輪到𠊎。」該儕講：「𠊎愛買轉去。」
5 波阿斯講：「當你對拿娥美買該垤田个時，你也應該討死人个寡婦摩押細妹仔路得；恁樣，該垤田正會保留在已經死掉个人名下。」
6 該至親應講：「恁樣，𠊎放棄買轉這垤田个權利，驚怕𠊎買轉去，𠊎自家个子女也無法度繼承這個產業。俾你買！𠊎做毋得買。」
7 該時代，以色列人買賣財產有一種慣例：賣方愛脫下自家个鞋給買方。佢等用這種方法表示買賣已經定著。
8 所以，當該至親對波阿斯講：「俾你買！」佢就脫自家个鞋給波阿斯。
9 波阿斯對該兜長老㧯所有在場个人講：「今晡日你等全部係見證人；𠊎已經對拿娥美買以利米勒㧯厥孻仔基連㧯瑪倫所有个家產。
10 𠊎又討瑪倫个寡婦，就係摩押細妹仔路得做𠊎个𡜵娘。恁樣，所有个產業就做得保留在已經死个人名下，又做得將死人个名繼續存留在本鄉㧯本族人當中。今晡日，你等全部係這事个見證人。」
11 該兜長老㧯城門口所有个人全部講：「好！𠊎等係見證人。願上主使你愛入門个𡜵娘生養盡多，像蕾潔㧯麗亞兩姊妹，建立以色列家族一樣。願你在以法他族中好額，在伯利恆有名望。
12 願上主通過這後生个婦人家俾你有後代，使你个家像猶大㧯塔瑪𫱔个孻仔法勒斯个家共樣興旺。」
13 所以波阿斯討路得做𡜵娘。上主賜福給姖，姖就有身項，𫱔一個孻仔。
14 城肚个婦人家對拿娥美講：「讚美上主！佢今晡日給你一個至親來照顧你。願這細人仔在以色列中有名望。
15 你个心舅惜你；姖為你所做个，比七個孻仔所做个還較多。這下姖𫱔一個孫仔；這孫仔會帶給你新个元氣，使你安享天年。」
16 拿娥美就將細人仔揇過來，養育佢。
17 鄰舍个婦人家㧯這細人仔安名俄備得。姖等相爭㧯大家講：「拿娥美有一個孻仔！」俄備得係耶西个阿爸；耶西就係大衛王个阿爸。
18 法勒斯到大衛个家譜記在下背：法勒斯𫱔希斯崙，
19 希斯崙𫱔蘭，蘭𫱔亞米拿達，
20 亞米拿達𫱔拿順，拿順𫱔撒門，
21 撒門𫱔波阿斯，波阿斯𫱔俄備得，
22 俄備得𫱔耶西，耶西𫱔大衛。