1過盡久以後，天旱第三年，上主對以利亞講：「你去見亞哈王，𠊎愛落雨在地上了。」
2以利亞就去，愛見亞哈王。該時，撒馬利亞个飢荒非常嚴重；
3亞哈喊管理王宮事務个俄巴底來。(俄巴底係虔誠敬畏上主个人。
4耶洗碧㓾上主个先知該時，俄巴底救出一百個先知，將佢等分做兩組，逐組五十儕，囥在山窿肚，又供給佢等食物㧯水。)
5亞哈對俄巴底講：「𠊎等到國內所有个泉源㧯山壢去尋，看尋得到青草來畜馬仔㧯騾仔麼；𠊎等就毋使㓾掉這兜頭牲。」
6所以佢等同意分開到無共樣个方向㧯地區去打探。
7在路上，俄巴底堵到以利亞。佢認出係以利亞，就伏在地上，問：「你斷真係𠊎个主以利亞麼？」
8以利亞講：「係！你去㧯王—你个主人講，以利亞在這位。」
9俄巴底講：「僕人犯麼介罪，你樣愛將𠊎交給亞哈，俾佢㓾𠊎呢？
10𠊎對永生上主—你个上帝發誓，無論㖠邦、㖠國，𠊎个主人攏總派人去尋你。若係有人講你無在該位，佢就愛喊該邦該國个人發誓講，斷真尋你毋到。
11這下你樣般對𠊎講：『去㧯你个主人講，以利亞在這位！』
12在𠊎離開以後，若係上主个靈帶你到另外一個𠊎毋知个地方，𠊎又㧯亞哈講你在這位，佢尋毋到你，一定會㓾死𠊎。你愛知，僕人從細就係虔誠敬畏上主个人。
13敢無人㧯吾主講，耶洗碧㓾上主个先知該時，𠊎將一百個先知囥在山窿肚？𠊎將佢等分做兩組囥起來，逐組五十儕，𠊎供給佢等食物㧯水。
14這下你講：『去㧯你个主人講，以利亞在這位！』佢一定會㓾死𠊎！」
15以利亞講：「𠊎指等𠊎所服事个上主—萬軍个元帥發誓，今晡日𠊎一定愛俾王看到𠊎。」
16所以，俄巴底到亞哈王該位去報告，亞哈就去見以利亞。
17亞哈看到以利亞就講：「㩢衰以色列个就係你麼？」
18以利亞講：「毋係𠊎㩢衰以色列；係你㧯若爸个家族！你等違背上主个命令，去跈巴力。
19這下，去召集所有个以色列人到迦密山見𠊎，又愛帶等耶洗碧王后所畜个四百五十個巴力个先知㧯四百個亞舍拉女神个先知共下來。」
20所以，亞哈召集所有个以色列人㧯巴力該兜先知上迦密山。
21以利亞企出來，對人民講：「你等三心兩意愛到幾時呢？若上主係上帝，就愛拜上主；若巴力係上帝，就拜巴力！」總係人民一句話也毋講。
22以利亞又講：「上主个先知只賸到𠊎一儕，總係巴力有四百五十個先知。
23你等帶兩隻牛牯來，俾巴力个先知先擇一隻，喊佢等將牛㓾掉，切做一垤一垤，放在柴頂，毋好點火；另外一隻牛給𠊎，𠊎也照恁樣做。
24然後，巴力个先知向佢等个神明祈禱，𠊎向上主祈禱；該降火應答祈禱个就係上帝！」人民全部講：「你恁樣講當好。」
25以利亞對巴力个先知講：「既然你等人多，你等先擇一隻牛去預備！向你等个神明祈禱，總係做毋得點火。」
26佢等將給佢等个牛預備好勢，就向巴力祈禱，對朝晨頭一直求到當晝。佢等盡喊：「巴力啊，答應𠊎等哪！」又緊圍等佢等起个祭壇跳舞，總係全無反應。
27當晝个時，以利亞㩢耍佢等講：「嘶較大聲兜仔！佢當然係神！可能佢在該位默想；可能佢盡無閒；也可能出去旅行了。無一定係睡掉去，你等去喊佢醒！」
28該兜先知就還較大聲祈禱，又照佢等个儀式用刀仔㧯短劍割傷自家，直到血流滿身。
29佢等一直盡嘶盡喊，對當晝直到臨暗仔獻祭个時，還係無反應，無回答，無一些仔聲音。
30所以，以利亞對大眾講：「你等到𠊎這位來！」佢等就全部圍等佢。佢先將壞掉个上主个祭壇整好。
31以利亞拿十二垤石頭，逐垤代表一個支族；這兜支族就係照雅各十二個孻仔安名个。上主識給雅各一個名喊做以色列。
32以利亞用這兜石頭起一個敬拜上主个祭壇。佢又在祭壇四周圍挖溝仔，可以裝十四公升榖種恁大。
33然後，佢將柴放在壇頂，將牛牯切做一垤一垤，放在柴頂。佢吩咐講：「㧡四桶水來，倒在祭物㧯柴頂高。」佢等照恁樣去做。
34佢又講：「再倒一擺！」佢等就再倒一擺。佢又再講：「倒第三擺！」佢等就倒第三擺。
35水流到祭壇个四周圍，溝仔水滿滿。
36到臨暗仔獻祭个時，先知以利亞到祭壇前祈禱講：「上主啊，亞伯拉罕、以撒、雅各个上帝啊，求你顯明你係以色列个上帝，也顯明𠊎係你个僕人，𠊎所做个全部係照你个命令。
37求你答應𠊎！上主啊，答應𠊎，使這人民知你—上主係上帝，又知係你使佢等回心轉意。」
38上主就降下火來，燒掉燒化祭、柴、石頭、㧯泥，又將溝仔个水燒燥掉。
39民眾看到，全部就伏在地上，大聲講：「上主係上帝！上主正係上帝！」
40以利亞下令講：「去捉巴力个先知，一個也毋好俾佢走掉！」民眾就捉到佢等。以利亞帶佢等到基訓河滣，在該位將佢等㓾掉。
41以利亞對亞哈王講：「這下你做得去食去啉。𠊎有聽到落大雨个響聲了。」
42亞哈去啉食个時，以利亞上到迦密山頂，跪在地上，頭那放在兩隻膝頭中央。
43佢對佢个僕人講：「你去，向海該片看。」僕人上去看了轉來，講：「𠊎無看到麼介。」以利亞喊佢再過去看加一擺，一共喊佢去看七擺。
44第七擺僕人轉來講：「𠊎看到一細垤雲，還無人个手巴掌恁大，對海該片上來。」以利亞吩咐僕人：「到亞哈王該位去㧯佢講，趕緊坐戰車轉去，若無，會被大雨擋到。」
45過一下仔，斷真烏雲滿天，起大風落大雨。亞哈就坐戰車，轉耶斯列去。
46上主个能力臨到以利亞，佢就繫𢫮腰帶，趕在亞哈頭前，一直走到耶斯列。