1有一個先知名喊以利亞，係基列个提斯比人。佢對亞哈王講：「𠊎指等𠊎所服事永生个上主—以色列个上帝發誓：這幾年內，𠊎若無講，天就毋會落雨，也毋會降露水。」
2上主對以利亞講：
3「你離開這位，向東行，到約旦河東片个基立溪附近囥起來。
4你做得啉溪肚个水；𠊎已經命令烏鴉送食物到該位給你食。」
5以利亞聽從上主个命令去住在約旦河東片个基立溪附近。
6佢啉溪肚个水；烏鴉逐日朝晨㧯臨暗仔就送餅仔㧯肉來給佢。
7過一站時間，因為無落雨，溪肚个水全部燥掉。
8所以，上主對以利亞講：
9「你到西頓附近个撒勒法去，住在該位。𠊎已經吩咐住在該位个一個寡婦供給你食物。」
10以利亞就去撒勒法。來到城門口个時，佢看到一個寡婦在該位拈柴。佢就喊姖講：「拜託你用罌仔裝兜水俾𠊎食。」
11寡婦愛去拿水个時，以利亞喊姖，講：「拜託也帶兜餅仔給𠊎！」
12寡婦講：「𠊎對永生上主—你个上帝發誓，𠊎無餅仔。𠊎只有賸罌肚一揢麵粉㧯罐肚一些仔橄欖油。𠊎到這位來拈兜仔柴，愛帶轉屋下去做餅，給𠊎兩子𡟓食；食掉後，𠊎等只有等死！」
13以利亞對姖講：「毋使驚！照你所講个去做！總係先做一垤細餅仔，拿來給𠊎食，然後正做兜仔給你㧯若孻仔食，
14因為上主—以色列个上帝恁樣講：『直到𠊎—上主落雨該日，裝麵粉个罌仔毋會見底，罐肚个油也毋會用淨淨。』」
15寡婦就去，照以利亞吩咐个話去做。佢等大家全部有好食，又食盡久。
16就像上主通過以利亞所應許个，裝麵粉个罌仔無見底，罐肚个油也無用淨淨。
17過一站時間，寡婦个孻仔發病仔，越來越嚴重，後來病到死掉。
18寡婦對以利亞講：「神人哪，你做麼介恁樣對待𠊎？你到這位來係愛使上帝想起𠊎个罪，使𠊎个孻仔死掉係麼？」
19以利亞講：「將細人仔交給𠊎！」佢對寡婦懷中將細人仔揇過來，帶到樓頂佢住个房間，放在眠床頂。
20然後以利亞大聲祈禱：「上主—𠊎个上帝啊，你做麼介降災禍給這寡婦呢？𠊎借厥屋下歇，你樣愛使姖个孻仔死掉呢？」
21以利亞三擺伏在細人仔身上，祈求講：「上主—𠊎个上帝啊，求你使這細人仔返生！」
22上主聽以利亞个祈禱，細人仔个靈魂就轉到佢个身體，佢就返生過來。
23以利亞將細人仔對樓頂揇下來，入到屋肚交給厥姆，對姖講：「看哪，若孻仔返生了！」
24寡婦對以利亞講：「這下𠊎確實知你係神人；上主通過你講个話全部係真實个！」