1在你等中間，聖徒彼此爭論个事，樣敢告到無信主个法官面前去呢？樣般毋請聖徒代你等解決？
2敢講你等毋知聖徒愛審判世界嗎？既然你等愛審判世界，敢無法度解決該兜小事情嗎？
3連天使也愛接受𠊎等个審判，你等敢毋知嗎？還愛使講世間个事情嗎？
4既然係恁樣，若係有爭論个事，你等樣般做得去求該兜教會無看重个人來處理呢？
5實在還見笑噢！敢講你等當中無一個有智慧个人好代信徒解決紛爭嗎？
6無想到，係兄弟告兄弟，還敢告到無信主个人面前去！
7你等告來告去，證明你等已經完全失敗了。被人冤枉，做麼介毋甘願？食虧有麼介相干呢？
8你等反轉冤枉人、虧負人，連對自家个兄弟姊妹也係恁樣。
9敢講你等毋知邪惡个人不能做上帝國个子民嗎？毋好自家騙自家！該兜犯淫亂、拜偶像、行姦淫、做孌童、親男色、
10偷拿、貪心、酒醉、譭謗人、抑係勒索人个，全部不能做上帝國个子民。
11你等中間，有兜人以前就係恁樣。總係，通過主耶穌基督个名㧯𠊎等上帝个靈，你等已經洗淨，已經聖化歸上帝，已經同上帝有正確个關係了。
12有人會講：「無麼介事𠊎做毋得个！」無毋著；總係，毋係逐樣事全部有利益。𠊎也做得講：「無麼介事𠊎做毋得个」，總係，𠊎毋被任何一件事來控制。
13有人會講：「食物係為到肚笥，肚笥係為到食物。」無毋著；總係有一日，上帝會使這兩樣攏總毀壞掉去。愛細膩噢！身體毋係為到行淫亂，係為到主來存在个；主會供給身體个需要。
14上帝已經使主對死復活；佢也愛用自家个大能使𠊎等復活。
15你等敢毋知，你等个身體係基督个肢體嗎？恁樣，𠊎樣般做得拿基督个肢體來做妓女个肢體嗎？絕對做毋得！
16你等也一定愛知，同妓女結連个，就係同姖成做一體。因為聖經講：「兩個人愛成做一體。」
17總係，同主結連个人，就係在靈性上同主合而為一。
18所以，你等愛避免淫亂。人無論犯麼介罪，全部在身體以外；唯有犯淫亂个人係得罪自家个身體。
19敢毋知你等个身體係聖靈个殿嗎？聖靈住在你等底背，係上帝所賜个。你等毋係屬自家，係屬上帝，
20因為你等係佢盡貴買來个。所以，你等愛用身體來榮光上帝。