1你等愛學𠊎，像𠊎學基督一樣。
2𠊎稱讚你等，因為你等常常記得𠊎，也遵守𠊎傳給你等个教訓。
3總係，𠊎希望你等明白，基督係每一個人个頭；老公係𡜵娘个頭；上帝係基督个頭。
4男人祈禱抑係宣傳上帝个話，若將頭那幪等就係羞辱基督。
5總係，婦人家祈禱抑係宣傳上帝个話，若無幪等頭那就係羞辱自家个老公。這種婦人家同剃掉頭那毛个婦人家無麼介分別。
6婦人家若係毋幪頭，姖就愛剃掉頭那毛；既然認為剃光頭抑係剪掉頭那毛係見笑个事，姖就應該幪等頭。
7男人毋使幪頭，因為佢係上帝个形像㧯榮光；總係，女人係男人个榮光。
8因為男人毋係對女人造个，顛倒，女人係對男人來造个；
9男人毋係為女人造个，總係，女人係為到男人來造个。
10所以，為到天使个緣故，婦人家應該愛幪頭巾，來表示姖順服老公个權威。
11其實，在主个底背，男人㧯女人互相倚靠，彼此需要。
12因為女人係對男人來造个，同時男人係對婦人家來出世个，總係萬物全部係對上帝來个。
13你等自家判斷！女人向上帝祈禱，毋幪頭著麼？
14你等个本性敢毋係指示你等，男人留長頭那毛係佢个見笑，
15總係女人留長頭那毛就係姖个榮光嗎？因為長頭那毛做得遮等姖个頭那。
16若有人愛辯駁，𠊎只有講，𠊎等㧯上帝个眾教會無別个規定。
17下背，𠊎所愛吩咐个，毋係愛稱讚你等，因為你等个聚會實在有損害無利益。
18第一，𠊎聽講，你等在教會聚會个時結黨分派。𠊎相信這個話有一部份係有影个。
19(你等中間有分派係難免个；這反轉會顯出麼人个主張較著。)
20恁樣，你等聚會个時，就毋係食主个晚餐。
21因為你等食个時，逐儕先食自家帶來个東西，結果有兜人餓肚笥，有兜人食酒醉。
22你等愛食愛啉，做麼介毋愛在屋下？抑係你等故意愛藐視上帝个教會，同時愛使窮苦人見笑係麼？𠊎對你等愛樣般講呢？愛稱讚你等嗎？𠊎實在無法度稱讚你等！
23𠊎所傳給你等个，係𠊎對主領受个：主耶穌被人出賣該暗晡，拿起餅仔，
24感謝上帝後，就擘開，講：「這係𠊎个身體，係為你等犧牲个；你等愛恁樣行，來紀念𠊎。」
25食飽後，佢照樣拿起杯仔，講：「這杯係上帝用𠊎个血所立个新約；你等逐擺啉个時，愛恁樣行，來紀念𠊎。」
26所以，你等逐擺食這個餅，啉這個杯，係宣告主个死，直到主再來。
27所以，無論麼人，若無用敬虔个心食主个餅，啉主个杯，佢就係得罪主个身體㧯主个血。
28每一個人應當先省察自家，然後正食這個餅，啉這個杯。
29若係佢食這餅啉這杯个時，無確認所食所啉个同主身體个關係，佢就係自惹審判。
30就係因為恁樣，你等中間正會有恁多人身體軟弱、發病，死掉个也有。
31𠊎等若先反省自家，就毋會受審判。
32總係，𠊎等受審判，係被主管教，愛使𠊎等毋使同世間人共下受定罪。
33所以，𠊎个兄弟姊妹啊，你等聚集來食主个晚餐个時，應當彼此等候。
34若有人肚飢，應該在屋下先食，免得聚會个時，受上帝審判。其他个事，等𠊎到，正來解決。