1兄弟姊妹啊，𠊎毋愛你等毋知，𠊎等个祖先跈摩西在曠野所經歷个事。佢等全部在雲个保護之下平安經過紅海。
2在雲中、在海肚，佢等攏總領洗禮同摩西結連。
3佢等全部食共樣个靈糧，
4啉共樣个靈水。這靈水係對同佢等共下行个屬靈个磐石流出來个；該磐石就係基督。
5總係，佢等當中，大部份係上帝無歡喜个人，所以佢等个身屍橫在曠野。
6這一切事係𠊎等个鑑戒，警告𠊎等毋好像佢等恁樣迷戀邪惡个事。
7佢等中間有兜人拜偶像；你等毋好像佢等恁樣拜偶像。像聖經所講：「這群人民坐下來大食大啉，企起來狂歡暢樂。」
8佢等中間有兜人行淫亂个事，𠊎等毋好像佢等恁樣淫亂；佢等因為淫亂，一日之內，死掉兩萬三千儕。
9𠊎等毋好像佢等中間有兜人恁樣試探基督；佢等因為試探佢被蛇咬死。
10你等毋好像佢等中間有兜人恁樣發怨言；佢等因為發怨言被執行毀滅个天使㓾死。
11佢等所堵到个這兜事全部係一種个鑑戒，記下來係愛做𠊎等个警戒，因為𠊎等係在末世个時代。
12所以，自認企得住个人就愛細膩，正毋會跌倒。
13你等所堵到个試探，無一樣係人捱毋住个。上帝係信實个；佢一定毋會俾你等堵到超過你等所能忍受个試探。試探來个時，佢會賜你等力量，使你等捱得住，代你等開一條出路。
14所以，𠊎親愛个朋友，你等愛遠離拜偶像个事。
15𠊎係看你等做明理个人來講話；你等自家也做得判斷，𠊎講个著抑係毋著。
16𠊎等啉祝謝過个杯，敢毋係分享基督个血嗎？𠊎等食擘開个餅，敢毋係分享基督个身體嗎？
17因為𠊎等只有一隻餅仔，所分享个係共隻餅仔；所以，𠊎等人雖然多，還係一體。
18請看以色列人；該兜食祭物个，就同祭壇發生關係。
19𠊎恁樣講係麼介意思呢？敢正經認為偶像㧯祭物本身係恁重要嗎？
20當然毋係！𠊎所愛講个就係：在異教个祭壇頂所獻个祭物係獻給鬼个，毋係獻給上帝个。𠊎毋愛你等同鬼相交。
21你等做毋得啉主个杯又啉鬼个杯，做毋得參加主个桌席又參加鬼个桌席。
22𠊎等愛惹主發譴係麼？𠊎等比佢較強係麼？
23有兜人講：「麼介事乜做得。」這個話無毋著。總係，毋係逐樣事全部有利益。「麼介事乜做得。」總係，毋係逐樣事攏總會造就人。
24無論麼人，毋好求自家个利益，愛關心別人个利益。
25市場所賣个肉，你等攏總做得食，毋使為良心个緣故查查問問。
26因為聖經講：「地上㧯其中个萬物全部係主个。」
27若有毋信主个人請你等食飯，你等也想愛去，恁樣，桌頂所擺个食物，放心去食，毋使為良心个緣故查查問問。
28總係，若有人對你等講，「該兜食物拜過偶像」，為到對你等講話个人，也為良心个緣故，你等就莫食。
29𠊎所講个，毋係指你等个良心，係該人个良心。因為，𠊎做麼介愛為到自家个自由被別人个良心來論斷呢？
30既然𠊎係存感謝个心來享受食物，做麼介愛俾別人因為𠊎所感謝个食物來批評𠊎呢？
31總講，你等無論做麼介，係食抑係啉，攏總愛為榮光上帝來做。
32無論係猶太人、外邦人、抑係上帝个教會，你等毋好害佢等跌倒。
33你等愛像𠊎恁樣行，無論麼介事情，愛使大家歡喜；𠊎毋係求自家个利益，只有關心眾人个利益，為到使佢等得救。