1做聖殿守衛个利未人所分派个工作記在下背：可拉族有可利个孻仔米施利米雅，係亞薩家族个人。
2米施利米雅有七個孻仔，照大細順序係：撒迦利亞、耶疊、西巴第雅、耶提聶、
3以攔、約哈難、以利約乃。
4另外一儕係俄別‧以東。上帝賜福給佢，佢有八個孻仔，照大細順序係：示瑪雅、約薩拔、約亞、沙甲、拿坦業、
5亞米利、以薩迦、比烏利太。
8俄別‧以東全家有六十二儕有能力擔任這工作。
9米施利米雅全家有十八儕有能力擔任這工作。
10米拉利族有何薩；何薩有四個孻仔—申利(佢毋係長子，總係厥爸立佢做領袖)、
11希勒家、底巴利雅、撒迦利亞。何薩家族有十三儕做聖殿守衛。
12聖殿守衛照家族分做幾組。佢等受派在上主个聖殿擔任職務，就像其他利未人共樣。
13每一家族，不管大細，全部用抽籤決定愛負責看守㖠個門。
14示利米雅抽到東門；佢个孻仔撒迦利雅係一個精明个參謀，抽到北門。
15俄別‧以東抽到南門；佢該兜孻仔抽到守倉庫。
16書聘㧯何薩抽到西門㧯蹶崎仔該條路項个沙利基門。守衛个任務照時間分組，一組接一組。
17東門逐日有六個守衛掌等，北門有四個，南門有四個。看守倉庫个守衛逐日也有四個；逐間倉庫兩個。
18偎近西片个走廊有四個守衛在路邊掌等，兩個在走廊堘看守。
19以上係分派給可拉㧯米拉利宗族个守衛職務。
20其他个利未人管理聖殿寶庫㧯放獻給上帝禮物个倉庫。
21革順个孻仔拉但係幾個家族个祖先，其中包含厥孻仔耶希伊利个家族。
22耶希伊利兩個孻仔西坦㧯約珥管理聖殿寶庫㧯倉庫。
23暗蘭、以斯哈、希伯倫、㧯烏薛个後代也全部分派有職務。
24摩西个孻仔革舜宗族个細布業掌管聖殿个寶庫。
25佢㧯示羅密有親戚關係，因為示羅密个祖先以利以謝係革舜个老弟。以利以謝𫱔利哈比雅；利哈比雅𫱔耶篩亞；耶篩亞𫱔約蘭；約蘭𫱔細基利；細基利𫱔示羅密。
26示羅密㧯厥屋下人管理所有獻給上帝个禮物，包含大衛王、逐家族族長、逐宗族个領袖㧯軍長所獻个。
27佢等對戰場上搶來个戰利品拿兜出來奉獻，做修整聖殿个路用。
28所有獻做聖殿用个東西全部係示羅密㧯佢全家管理，包含先見撒母耳、基士个孻仔掃羅王、尼珥个孻仔押尼珥㧯洗璐雅个孻仔約押所獻个禮物。
29以斯哈後代當中，基拿尼雅㧯厥該兜孻仔受派負責行政工作：管理公文記錄，也為以色列人處理紛爭个事。
30希伯倫後代當中，哈沙比雅㧯佢个親人受派管理約旦河西片以色列所有上主㧯王个事務；總共有一千七百儕，全部盡有能力。
31耶利雅係希伯倫後代个領袖。大衛做王第四十年，對希伯倫後代全家族做一擺調查，發現這家族个勇士全部住在基列境內个雅謝。
32大衛王對耶利雅親人當中選出兩千七百個有能力个家族長，派佢等管理約旦河東片，就係呂便、迦得、㧯東瑪拿西境內以色列所有上主㧯王个事務。