1大衛王㧯利未人个領袖分派亞薩、希幔、耶杜頓三個利未宗族主持禮拜个事。佢等愛將上帝个話唱出來，用豎琴、七弦琴，㧯鑇仔奏樂。以下係受選主持禮拜个人个名單㧯職務：
2亞薩个四個孻仔—撒刻、約瑟、尼探雅、雅薩利拉，接受亞薩个指導。亞薩照王个命令將上帝个話唱出來。
3耶杜頓个六個孻仔—基大利、西利、耶篩亞、示每、哈沙比雅、瑪他提雅，在阿爸指導下將上帝个話唱出來，用豎琴奏樂；佢等也向上主唱頌讚㧯感謝个詩歌。
4希幔有十四個孻仔；佢等係布基雅、瑪探雅、烏薛、細布業、耶利摩、哈拿尼雅、哈拿尼、以利亞他、基大利提、羅幔提‧以謝、約施比加沙、瑪羅提、何提、瑪哈秀。
5上帝照佢个應許，賜王个先見希幔有這十四個孻仔，又有三個妹仔，使希幔有權力。
6希幔該兜孻仔在佢指導之下，配合上主聖殿个禮拜，彈奏豎琴、七弦琴㧯鑇仔。亞薩、耶杜頓、㧯希幔全部聽王个命令。
7這二十四個人全部係專家，㧯佢等同工个利未同胞也係受過訓練頌讚上主，一共有兩百八十八人。
8這兜人無論後生、年老、專家，抑係初學个，全部用抽籤个方式決定所擔任个職務。