Romans 14
1 信心軟弱个人，你等愛接納佢；意見無共樣，也毋好同佢辯論。
2 有信心个人，麼介都食；信心軟弱个人單淨食菜。
3 麼介都食个人毋好看輕毋食个人；單淨食菜个人也毋好論斷麼介都食个人；因為上帝已經接納佢。
4 你係麼人，樣敢論斷別人个僕人？佢係成功抑係失敗，有佢个主人來管。佢會成功，因為主會幫助佢，使佢企得正。
5 有人認為這日比別日較重要；也有人認為逐日全部共樣恁重要。每一個人攏總應該有自家个意見。
6 特別看重某日个，係表示佢對主个尊崇。麼介都食个，也係表示佢對主个尊崇，因為佢為到所食个感謝上帝；有兜食物毋食个，共樣也係表示佢對主个尊崇，佢乜感謝上帝。
7 𠊎等當中，無人係單淨為到自家來生，也無人係單淨為到自家來死；
8 𠊎等若係生，係為到主來生；若係死，也係為到主來死。恁樣來講，無論係生抑係死，𠊎等攏總係屬主个人。
9 基督所以死又復活，目的就係愛做生人㧯死人个主。
10 既然係恁樣，你做麼介論斷你个兄弟姊妹啊？你做麼介看輕你个兄弟姊妹啊？𠊎等將來攏總愛企在上帝个面前，接受佢个審判；
11 因為聖經講：主講：𠊎指等𠊎个生命發誓，逐個人攏總愛跪落去拜𠊎；人類全部愛承認𠊎係上帝。
12 恁樣來講，𠊎等每一個人定著愛將自家个事在上帝个面前交帶清楚。
13 所以，𠊎等毋好繼續彼此論斷下去；應該下決心，毋做會害兄弟姊妹跌倒犯罪个事。
14 憑𠊎㧯主耶穌个親密關係，𠊎確實知，食物本身全部係淨浰个；總係，若係有人相信某種食物係無淨浰个，對佢來講，該種食物就係無淨浰个了。
15 你若係因為食物傷到兄弟姊妹个心，你就毋係照愛心行事。基督已經為佢死，你毋好因為你个食物來敗壞佢！
16 毋好因為你看做好个事，害你自家被人批評。
17 因為順從上帝个主權毋係靠食物，係靠聖靈所賜个公正、和平，㧯喜樂。
18 恁樣服事基督个人，一定會得到上帝个歡喜㧯人个稱讚。
19 所以，𠊎等愛追求和睦㧯彼此造就个事。
20 毋好因為食物破壞上帝个工作。一切食物全部做得食，總係因為食來害別人跌倒，就盡毋好。
21 若係恁樣，最好莫食肉，莫啉酒；莫做害你兄弟姊妹跌倒个事。
22 你對這兜事情樣般相信，你在上帝个面前就樣般去行！認定係著个，就照恁樣去行，也毋會自責个，係有福氣个人！
23 總係，心肝還疑狐就拿來食，上帝會定佢个罪，因為無照信心來食。行事無照信心做个，全部係罪。