Bible

1 人人愛服從國家个權力機關，因為權力个存在係上帝所批准个；掌權者个權力係對上帝來个。 2 所以，抵抗掌權者个就係抵擋上帝个命令；這種人難免受審判。 3 統治者毋係愛使行善个人驚，係愛使作惡个人驚。你想愛毋驚掌權者麼？行善，佢就會稱讚你； 4 因為佢係上帝所用个人，佢个工作係愛利益你。你若係做壞事，你就愛驚佢，因為佢有刑罰个權毋係做搞个。佢做上帝所用个人，係愛執行上帝對該兜作惡个人个責罰。 5 所以，你等一定愛服從掌權者，毋單淨係因為驚上帝个責罰，也係為到自家良心个平安。 6 你等納稅，也係為到共樣个理由，因為掌權者執行任務个時係為上帝工作。 7 所以，應當愛納麼介稅，你等就愛聽佢等个話去納，無論係人丁稅抑係產業稅；應當敬畏个人，就愛對佢等敬畏；應當尊重个人，就愛對佢等尊重。 8 千萬毋好欠債！彼此相惜正係你等應該欠个債。所有惜別人个，就係遵守法律。 9 法律个命令規定：「做毋得犯姦淫；做毋得㓾人；做毋得偷拿；做毋得貪心。」這一切㧯其他个命令全部係包含在「惜別人像自家」這條命令底背。 10 惜別人个，就毋會做傷害別人个事；所以，有愛心正會使法律得到圓滿。 11 你等一定愛恁樣行，因為你等知應該睡醒个時節到了。𠊎等得救，這下比初信个時還較接近。 12 暗晡時會過，天會光了。𠊎等毋好再做烏暗个事；愛帶等光明个武器來作戰。 13 𠊎等个行事為人愛光明正大，像生活在日時頭个人共樣。毋好盡食盡啉，毋好好色放蕩，毋好冤家嫉妒。 14 總講，你等愛著上主耶穌基督；毋好想愛滿足肉體个情慾！