Revelation 3
1 「你愛寫信仔給撒狄教會个使者，講：『該有上帝七個靈㧯七粒星仔个，恁樣講：𠊎知你所做个；𠊎知有人恅到你係生个，實際上你係死个！
2 所以，好醒了！愛堅固你所賸一些仔吂死掉个；因為𠊎看出你所做个，在𠊎个上帝面前還吂完全。
3 所以，你愛記得所聽、所接受个教訓，確實去遵行，離開你个罪惡。你若還毋醒，𠊎愛像賊仔恁樣忽然來到；你絕對毋會知𠊎愛來到个時間。
4 總係，在撒狄，你等還有兜人衫褲保持到盡淨浰；這兜人堪得著白色个長袍，同𠊎共下行。
5 得勝个人共樣也愛著白色个長袍。𠊎絕對毋會對生命冊將佢个名拭掉；在吾爸㧯佢个天使面前，𠊎愛公開承認佢係屬𠊎个。
6 『聖靈對各教會所講个話，有耳公好聽个，就愛聽！』」
7 「你愛寫信仔給非拉鐵非教會个使者，講：『該神聖又信實、掌管大衛个鎖匙、打開門就無人能關、關門就無人能開个，佢恁樣講：
8 𠊎知你所做个；𠊎知你只有一些个能力，總係你遵守𠊎个教訓，無否認𠊎个名。𠊎已經在你面前開一扇門，係無人能關个。
9 看啊，該兜撒但一黨个人，自稱猶太人其實毋係猶太人，佢等係騙仔；𠊎愛喊佢等來，在你腳前跪拜，俾佢等知𠊎惜你。
10 因為你遵守𠊎个命令，忍耐到底，所以在患難臨到全世界、全人類受試煉个時，𠊎愛保守你。
11 𠊎就會到了。你愛持守你所有个，你得勝个冕旒毋好被人搶走。
12 得勝个人，𠊎愛使佢做𠊎上帝个聖殿底背个柱仔；佢永遠毋會離開該位。𠊎愛在佢身上寫𠊎上帝个名，還有𠊎上帝个城个名，就係對天頂、對𠊎上帝該位降下來个新耶路撒冷；𠊎也愛將𠊎个新名寫在佢身上。
13 『聖靈對各教會所講个話，有耳公好聽个，就愛聽！』」
14 「你愛寫信仔給老底嘉教會个使者，講：『該名安到阿愐个，係信實可靠个見證者，係上帝創造个根源，佢恁樣講：
15 𠊎知你所做个；𠊎知你無冷也無熱；𠊎盡希望你係冷个抑係熱个！
16 因為你像溫水恁樣，無冷也無燒，𠊎愛將你對𠊎个嘴呸出去！
17 你講：𠊎係富足个，𠊎盡發，麼介都無欠。總係，你毋知自家係樣般衰過，樣般可憐！你窮苦、青盲、又赤身露體。
18 所以，𠊎勸你對𠊎買用火煉過个金仔，使你成做富足；買白色个長袍來著，將你見笑个身體遮起來；買目藥來膏你个目珠，使你看得到。
19 𠊎所惜个人，𠊎就責備管教。所以，你愛熱心起來，也愛悔改。
20 聽啊，𠊎企在門外掽門；若有人聽到𠊎个聲來開門，𠊎愛入去佢該位；𠊎同佢，佢同𠊎共桌食飯。
21 得勝个人，𠊎愛賜佢權利，在𠊎个寶座上同𠊎共下坐，就像𠊎已經得勝，這下在吾爸个寶座上同佢共下坐一樣。
22 『聖靈對各教會所講个話，有耳公好聽个，就愛聽！』」