Psalms 94
1 上主啊，你係伸冤个上帝；伸冤个上帝啊，你好發火了！
2 你係全人類个審判者；求你䟘起來報應驕傲个人！
3 上主啊，壞人个日仔有幾多？佢等洋洋得意愛到幾時呢？
4 作惡个人誇口愛到幾時？佢等還愛驕傲到幾時呢？
5 上主啊，佢等壓制你个子民；佢等迫害該兜屬你个人。
6 佢等殺害寡婦㧯孤兒，又謀殺暫住个生份人。
7 佢等講：「上主毋會看到；雅各个上帝毋會關心。」
8 你等野蠻人啊，樣般恁𤘅呾？你等戇檔人啊，幾時正明白？
9 上帝造𠊎等个耳公，佢敢毋會聽？上帝造𠊎等个目珠，佢敢毋會看？
10 佢管理萬國，敢毋會責罰人？佢係人類个導師，敢會無智識？
11 上主清楚人个心思；佢等所想全係虛空。
12 上主啊，你所管教个人有福氣，就係你用教示來指導个人！
13 佢在患難中，你使佢平安，直到壞人跌落深坑滅亡。
14 上主毋會㧒掉佢个子民；佢毋會放掉屬佢个人。
15 公義定著會在法庭再出現；正直个人攏總會維護正義。
16 麼人為到𠊎䟘起來攻擊壞人？麼人企在𠊎這片對抗作惡个人？
17 上主若無幫助𠊎，𠊎早就落陰間囉！
18 逐擺，𠊎講：「𠊎个腳打盪溜了！」上主啊，你不變个慈愛就扶持𠊎。
19 𠊎操煩憂愁个時節，你安慰𠊎，使𠊎快樂。
20 你同腐敗个官員無來往；佢等使不義个成做合法。
21 佢等勾結謀害義人，將無罪个人判死刑。
22 總係上主係𠊎个要塞；𠊎个上帝係𠊎避難个磐石。
23 佢愛因為佢等个邪惡報應佢等，照佢等所犯个罪來消滅佢等；上主—𠊎等个上帝愛消滅佢等。