Bible

Psalms 91

Chinese (T) - TNV2012

1 無論麼人，對至高者尋求安全，抑係住在全能者个庇佑之下，

2 全部做得對上主講：「你係𠊎个避難所㧯城堡；你係𠊎个上帝，𠊎信靠你。」

3 佢會救你脫離一切个羅網，並脫離一切致命个傳染病。

4 佢會用自家个翼胛庇佑你；得到佢个看顧，你一定安全；佢个信實會像盾牌保護你。

5 暗晡時，你毋使驚麼介危險，日時頭，你毋使驚堵到攻擊；

6 你毋使驚烏暗中流行致命个傳染病，也毋使驚當晝頭毀滅性个災害。

7 雖然有歸千人橫在你左片，有歸萬人死在你个右片，這個災難也無可能臨到你。

8 你打開目珠親眼來看，就會看到壞人受責罰。

9 因為你靠上主做你个避難所，既然至高者就係你住个所在，

10 災難一定毋會臨到你，災禍毋會接近若屋下。

11 上帝會差派天使看顧你，在你所行个路上保護你。

12 佢等會用雙手來扶等你，使你个腳毋會撞到石頭。

13 你會將獅仔㧯毒蛇踏在腳下；你會蹬死兇惡个獅仔㧯大蛇。

14 上帝講：「𠊎愛拯救該兜專心敬愛𠊎个人；𠊎愛保護尊𠊎做主个人。

15 佢等求喊𠊎个時節，𠊎會應佢等；佢等在患難中，𠊎愛同佢等共下。𠊎愛拯救佢等，使佢等得到光榮。

16 𠊎愛使佢等享受長壽，俾佢等看到𠊎个救恩。」