Bible

1 上主啊，對你獻上感謝實在真好！至高者啊，歌頌你个名實在真好！ 2 𠊎逐朝晨愛傳揚你不變个慈愛，𠊎逐暗晡愛講說你个信實， 3 愛用十弦琴來伴奏，用豎琴美妙个聲音來和。 4 上主啊，你个作為使𠊎得到歡喜；𠊎愛因為你个手所做个來歡呼。 5 上主啊，你所行个真偉大！你个意念實在非常深！ 6 𤘅呾个毋會了解，戇仔也毋會明白這件事： 7 雖然壞人像野草恁會生，行事積惡个興旺一時，佢等最後會完全消滅； 8 總係，上主啊，你永遠係至高無上个！ 9 上主啊，𠊎等清楚知：你該兜仇敵定著會滅亡；行事積惡个全部會四散。 10 你使𠊎像野牛恁強壯；你賜給𠊎極大个幸福。 11 𠊎親目看到𠊎个仇敵失敗；𠊎親耳聽到攻擊𠊎个壞人噭吱。 12 正直个人會像棕樹恁茂盛，像黎巴嫩个香柏樹恁高大。 13 佢等像種在上主聖殿肚个樹仔，在𠊎等上帝个庭院肚緊來緊旺， 14 到老還係會結果子，枝葉拶拶，永遠青翠。 15 這證明上主係公正个，𠊎个磐石全無不義。