Bible

1 以色列个牧者啊，你帶領約瑟像帶羊群一樣，求你側耳來聽！坐在基路伯寶座上个主啊，求你顯出你个榮光！ 2 在以法蓮、便雅憫、瑪拿西面前，求你彰顯你个大能來救𠊎等！ 3 上帝啊，求你復興𠊎等！求你顯出慈愛，𠊎等就會得救！ 4 主上帝—萬軍个元帥啊，你个子民祈禱求喊你，你還愛發閼到幾時呢？ 5 你使佢等用目汁準飯來食，使佢等啉掉一大杯个目汁。 6 你使鄰國在𠊎等个土地交戰；𠊎等个仇敵也隨意㩢耍𠊎等。 7 上帝—萬軍个元帥啊，求你復興𠊎等！求你顯出慈愛，𠊎等就會得救！ 8 你對埃及徙一頭葡萄樹出來；你逐走列國，將這頭樹種下去。 9 你為它開墾一大片个土地，它就釘根盡深，遰到全地。 10 群山被它个陰影遮等；它个樹枝揜過香柏樹。 11 它个樹枝探到地中海；樹根伸入幼發拉底河。 12 你做麼介拆掉它个籬笆，由在過路人摘它个葡萄？ 13 樹林中个山豬入來蹧踏它，荒山中个野獸入來吞食它。 14 上帝—萬軍个元帥啊，求你回心轉意！求你對天頂看下來！求你照顧這葡萄樹， 15 就係你親手種个葡萄樹，你所照顧俾它長大个幼枝。 16 𠊎等个仇敵將這頭樹斬去燒掉；求你對佢等發譴，來消滅佢等！ 17 求你庇佑你所設立个國家，保護你自家所揀選个子民。 18 𠊎等絕對毋會再離開你；給𠊎等生命，𠊎等就會求喊你个名。 19 主上帝—萬軍个元帥啊，求你復興𠊎等！求你顯出慈愛，𠊎等就會得救！