Bible

Psalms 81

Chinese (T) - TNV2012

1 愛對上帝𠊎等个力量歡喜唱歌！愛大聲頌讚雅各个上帝！

2 愛唱歌，打鈴鼓，愛用琴㧯弦來彈好聽个音樂。

3 初一該日愛歕羊角，十五過節時也愛歕。

4 這係給以色列个規則，係雅各个上帝命令个。

5 佢出發攻擊埃及个時，將這法令交給約瑟个後代。𠊎聽到𠊎無明白个聲音講：

6 「係𠊎將你肩頭頂个重擔徙走；𠊎使你放下裝滿磚仔个畚箕。

7 你在急難中求𠊎，𠊎就救你。𠊎在響雷公个密雲中應你，在米利巴个泉水滣考驗你。

8 𠊎个子民啊，愛聽𠊎个勸話！以色列啊，希望你會聽從𠊎！

9 你絕對做毋得事奉外邦人个神明；𠊎以外，你千萬做毋得跪拜別个神。

10 𠊎係上主—你个上帝；𠊎對埃及帶你出來。打開你个嘴，𠊎會餵飽你。

11 「總係𠊎个子民毋聽𠊎个話；以色列人毋肯完全服從𠊎。

12 所以𠊎由在佢等硬頸，去照佢等个戇檔行事。

13 真希望𠊎个子民會聽𠊎个話！真希望以色列會遵行𠊎个道！

14 𠊎會盡遽制伏佢等个仇敵，攻擊所有㧯佢等作對个人。

15 恨𠊎个會降服在𠊎面前；佢等會受責罰直到永遠。

16 總係，𠊎會用最好个麥仔來養育你等，也賜你等石縫中个蜂糖，使你等飽足。」