Psalms 74
1 上帝啊，你做麼介㧒掉𠊎等恁久？你愛永遠對你牧養个羊群譴到發火嗎？
2 愛記得你古時代揀選个子民，就係你所贖、歸你自家个民族；求你紀念你識住過个錫安山。
3 𠊎等个仇敵已經將聖殿毀滅掉囉；求你徙腳步過來看這荒涼个所在。
4 你个仇敵在你个聖殿肚大聲喊；佢等將佢等得勝个旗仔擎起來。
5 佢等像斬樹仔个人，拿等斧頭緊劈緊斬。
6 聖殿肚所有雕刻个柱𣎴，全部用斧頭㧯鐵鎚敲掉。
7 佢等還放火燒你个聖殿；佢等褻瀆敬拜你个所在，拆到貼貼。
8 佢等決心講：「𠊎等來將佢等徹底消滅」；佢等就將這地方逐間聖所燒淨淨。
9 神聖个記號全部毋見掉了；也無一個先知了；𠊎等當中無人知這災難愛到幾時。
10 上帝啊，仇敵笑你愛到幾時呢？敢講敵人會永遠褻瀆你个名係麼？
11 你做麼介毋伸右手幫助𠊎等？求你對懷中伸手消滅佢等。
12 上帝啊，自古以來你係𠊎个王；在這世間，施行拯救个就係你。
13 你用大能分開海水；你打爛海怪个頭那。
14 你將大海怪个頭那打到糜糜，將牠个肉分給曠野个動物食。
15 係你使泉水緊湧等出來；係你使大河壩个水燥掉。
16 日夜个變化係你个旨意；日頭㧯月光係你排列个。
17 大地个界限係你設立个；熱天㧯寒天係你安排个。
18 上主啊，毋好毋記得你个仇敵嘲謔你；毋好毋記得無敬虔个人樣般藐視你个名。
19 毋好將你純良个子民交給殘暴个敵人；毋好永遠毋記得你這兜受壓迫个子民。
20 求你紀念你同𠊎等所立个契約，因為地上烏暗个所在充滿暴力。
21 求你莫俾受壓迫个人堵到侮辱；愛俾窮苦無人幫助个人頌讚你。
22 上帝啊，求你䟘起來爭取你自家个正義；求你毋好毋記得無敬虔个人歸日笑你。
23 毋好毋記得你个仇敵得意个笑聲；毋好毋記得你个敵人無停个吵鬧。