Bible

1 上帝啊，𠊎等感謝你，𠊎等感謝你！𠊎等宣揚你个偉大，講說你奇妙个作為！ 2 上帝講：「𠊎已經定好日仔；𠊎愛用公當來施行審判。 3 雖然地㧯住在地上个人搖動，𠊎還愛使地个根基得到堅固。 4 𠊎喊驕傲个人莫驕傲；𠊎喊兇惡个人莫好鬥； 5 莫自大頭昂昂，莫講話頸橫橫。」 6 人得到高升毋係對東方抑係西方來个，也毋係對曠野來个； 7 唯有上帝斷定一切；佢使一儕降下，一儕高升。 8 上主个手中拿等一隻杯仔，底背裝滿佢大發譴个釅酒；佢倒出來，世上邪惡个人攏總愛啉，一直啉到最後一滴。 9 總係𠊎愛宣揚雅各个上帝；𠊎愛唱歌頌讚佢直到永遠。 10 佢愛打碎壞人个權勢；佢愛加添義人个力量。