Bible

1 上帝啊，求你教導國王，使佢照你个公義來審判；求你將你个公義賜給王子。 2 恁樣佢就會用正義治理你个子民，照公當對待該兜屬你个窮苦人。 3 願大山細山因為公義，使全國人民享受太平。 4 願王照公當庇佑窮苦人，援助有欠缺無人幫助个，同時打擊欺壓佢等个人。 5 就算日頭還發光，月光也還在，願你个子民世世代代敬畏你！ 6 願王像雨水落在草埔；願王像甘霖滋潤大地。 7 願佢在位个日仔正義伸張；願國泰民安就像月光長存。 8 佢个國對這隻海透到該隻海，對幼發拉底河一直透到地極。 9 住在曠野个會向佢行禮；佢个仇敵會伏下降服佢。 10 他施㧯列島該兜王會對佢獻上貢物；示巴㧯西巴个眾王也帶禮物來。 11 列王會跪拜佢；萬國會服事佢。 12 佢透放對佢求喊个窮苦人，透放受壓迫㧯無人幫助个人。 13 佢憐憫軟弱窮苦个人；佢拯救窮苦人个性命。 14 佢救佢等脫離壓迫㧯強暴；佢看佢等个生命做盡寶貴。 15 願王萬歲！願佢得到示巴个金仔；願有人時常緊代佢祈禱，求上帝一直賜福給佢！ 16 願土地五榖豐登，有豐富个收成；山頭果子滿遍，就像黎巴嫩一樣；願城市个人興旺，像野地生滿青草。 17 願佢个名永遠被人紀念；願佢个名聲像日頭長存。願萬民對佢得到福氣；願萬國稱佢真有福氣。 18 愛頌讚上主—以色列个上帝！唯有佢正行得出奇妙个事。 19 愛永遠頌讚佢榮耀个名！願佢个榮光充滿全世界！阿愐！阿愐！ 20 耶西个孻仔大衛个祈禱結束。