Psalms 71
1 上主啊，𠊎尋求你个庇佑；求你永遠莫俾𠊎見笑。
2 你係公義个，求你救𠊎，透放𠊎；求你耳公側側來聽𠊎，拯救𠊎。
3 求你做𠊎避難个巖石，𠊎隨時做得去个所在；也求你下命令來救𠊎，因為你係𠊎个磐石㧯城堡。
4 𠊎个上帝啊，救𠊎脫離壞人个手；使𠊎脫離殘暴邪惡个人个勢力。
5 至高个上主啊，你係𠊎个希望；𠊎從細到這下就一直信靠你。
6 𠊎一生所倚靠个就係你；使𠊎平安出母胎个係你。𠊎愛一生人讚美你無停！
7 盡多人認為𠊎个一生非常奇怪，總係你一直係𠊎堅固个避難所。
8 𠊎一開嘴就讚美你，歸日宣揚你个榮光。
9 求你毋好在𠊎年老个時節㧒掉𠊎；求你毋好在𠊎無氣力个時放掉𠊎。
10 𠊎个仇敵議論𠊎、打探𠊎；佢等彼此計謀想愛害𠊎。
11 佢等講：「上帝已經將佢㧒掉了；𠊎等來去捉佢，無人能救佢了！」
12 上帝啊，求你毋好離開𠊎恁遠；𠊎个上帝啊，求你遽遽幫助𠊎！
13 願該兜攻擊𠊎个人失敗消滅；願想愛害𠊎个人見笑受侮辱。
14 總係𠊎，𠊎愛一直盼望；𠊎愛更加煞猛讚美你！
15 𠊎愛日夜講起你个公義㧯救恩，雖然該兜遠遠超過𠊎所能了解。
16 至高个上主啊，𠊎愛來頌讚你个大能；𠊎所愛宣揚个，係你自家个公義定定。
17 上帝啊，𠊎從細時就得到你个教導；直到這下，𠊎還傳揚你奇妙个作為。
18 這下𠊎人老，頭那毛白白，上帝啊，求你毋好放掉𠊎！𠊎愛先對下代傳揚你个能力，將你个大權能指示後代个人。
19 上帝啊，你个公義比天較高！你所成个大事，無人比抑得！
20 你使𠊎經歷多多災難痛苦；總係你會再回復𠊎个元氣；你會對陰間底背救𠊎上來。
21 你會使𠊎比先前較有尊榮；你定著會再過一擺安慰𠊎。
22 𠊎个上帝啊，𠊎愛彈琴頌讚你个信實！以色列个至聖者啊，𠊎愛彈琴歌頌你！
23 𠊎頌讚你个時，愛大聲歡喜；𠊎愛唱歌，因為你有拯救𠊎。
24 𠊎歸日愛講起你个公義，因為想愛害𠊎个人已經失敗見笑。