Bible

1 上帝啊，𠊎等應當在錫安讚美你；𠊎等應當對你還所許个願。 2 聽人祈禱个主啊，人人應當就近你。 3 罪惡贏過𠊎等个時，你赦免𠊎等个過犯。 4 你所揀選、帶來住在你聖所个人，實在有福氣噢！𠊎等會享受你聖所个豐盛到心滿意足，就係你聖殿个福氣！ 5 拯救𠊎等个上帝啊，你用奇妙个作為來應𠊎等个祈禱，給𠊎等勝利。世間个萬民㧯天涯海角个人全部信靠你！ 6 你彰顯你个大能，用力量安定群山。 7 你平靜大海个吼聲，波浪个吵鬧，㧯萬民个騷動。 8 全世界因為你所成就个大事來敬畏你；對日出到日落之地个人因為你个作為來歡呼。 9 你看顧土地，落甘霖來滋潤它；你使土地得到滋養，俾它肥起來。你所賜个河壩，雨水滿滿；你使大地繼續出產五榖。 10 你使耕地雨水充足，用水滋潤田地；你落雨俾燥泥鬆軟，使農作物得到生長。 11 你个恩典使𠊎等年年豐收；有你腳跡个所在就有富足。 12 牧場中牛羊成群；山嶺間歡聲滿遍。 13 牛羊滿山，五榖滿坑；萬物一同歡呼歌唱！