Bible

1 全世界愛歡喜大聲頌讚上帝！ 2 愛唱歌頌讚佢榮光个名！愛獻讚美个詩來榮耀佢！ 3 愛對上帝講：「你所做个實在奇妙！你个能力大到連仇敵也降服你！ 4 全世界攏總愛敬拜你，對你唱歌，頌讚你个名。」 5 來啊，來看上帝所做个大事；來看佢在人間奇妙个作為。 6 佢識將海變做燥地，使𠊎等个祖先行等過河壩；𠊎等在該位因為佢快樂。 7 佢憑自家个大能掌權到永遠；佢用佢个目珠鑒察萬邦萬國；悖逆个人啊，毋好自高自大噢！ 8 萬民啊，愛頌讚𠊎等个上帝，俾讚美佢个聲音傳遍四方。 9 佢有保守𠊎等个生命，使𠊎等个腳無打盪溜。 10 上帝啊，你識考驗𠊎等；你鍛鍊𠊎等，像煉銀仔。 11 你使𠊎等陷落羅網底背；你用重擔磧𠊎等个背囊。 12 你准仇敵坐戰車輾𠊎等个頭那；𠊎等又經歷水深火熱个試煉；然後你帶𠊎等到豐盛个所在。 13 𠊎愛帶燒化祭入你个聖殿，對你還𠊎所許个願， 14 就係患難中𠊎親口許个願。 15 𠊎愛獻肥肥个頭牲做燒化祭；𠊎愛將綿羊牯、牛牯㧯山羊牯，做香香个燒化祭獻給你。 16 敬畏上帝个人啊，你等來聽！𠊎愛講起佢為𠊎所做个奇事。 17 𠊎識開嘴求喊佢；𠊎也出聲頌讚佢。 18 𠊎若係心懷罪惡，主一定毋聽𠊎求。 19 總係上帝實在聽到了；佢留心聽𠊎祈禱个聲。 20 上帝係應當得到稱頌个，因為佢無拒絕𠊎个祈禱，也無收轉佢不變个慈愛。