Bible

1 𠊎个上帝啊，求你拯救𠊎脫離仇敵；求你保護𠊎脫離該兜攻擊𠊎个人。 2 求你拯救𠊎脫離作惡个人，使𠊎脫離好流人血个兇手。 3 看啊，佢等埋伏愛攻擊𠊎；殘暴个人歸群同𠊎作對。毋係因為𠊎有麼介過犯，也毋係𠊎有做麼介壞事。 4 上主啊，佢等遽遽準備，愛來攻擊𠊎，並毋係因為𠊎犯了麼介過失。 5 上主—萬軍个元帥上帝啊，䟘起來幫助𠊎！以色列个上帝啊，求你親自來鑒察！求你䟘起來責罰列邦；毋好對悖逆你个壞人發出慈悲！ 6 佢等暗晡時正轉來，就像野狗恁樣緊吠，在城底背逛來逛去。 7 你聽佢等个侮辱㧯恐嚇；佢等个舌乸像利劍對嘴歕出來一樣；佢等一直講：「有麼人聽到？」 8 總係上主啊，你笑佢等；你愛嘲謔列國。 9 𠊎个力量啊，𠊎倚靠你；上帝啊，你係𠊎个城堡。 10 𠊎个上帝惜𠊎，佢在𠊎頭前行；上帝愛俾𠊎看𠊎个仇敵失敗。 11 上帝啊，毋好消滅佢等，免得𠊎个人民毋記得。求你用你个大能使佢等四散漂流！保護𠊎等个主啊，求你打橫佢等！ 12 佢等滿嘴罪惡，舌乸也盡毒；願佢等被自家个驕傲纏等！因為佢等咒罵，欺騙， 13 求你大發譴來消滅佢等；求你將佢等毀滅到淨淨！萬民正會知治理以色列个，佢就係統治全世界个上帝。 14 𠊎个仇敵暗晡時正轉來，就像野狗恁樣緊吠，在城底背逛來逛去。 15 像野狗走上走下尋食物，佢等若無食飽就噭無停。 16 總係𠊎愛唱歌頌讚你个力量；逐朝晨𠊎愛大聲歌唱你不變个慈愛。你一直係𠊎个城堡，𠊎患難中个避難所。 17 𠊎个力量啊，𠊎愛唱歌頌讚你；上帝係𠊎个城堡，係痛惜𠊎个上帝。