Psalms 55
1 上帝啊，求你側耳聽𠊎个祈禱；毋好毋搭𠊎，由在𠊎緊求。
2 求你留心聽𠊎，應𠊎；𠊎煩躁到無葛無煞。
3 仇敵恐嚇𠊎，壞人壓迫𠊎；佢等製造災難害𠊎；佢等大發譴，想愛謀害𠊎。
4 𠊎个心充滿痛苦；驚死个感覺緊迫𠊎。
5 𠊎歸身驚到愊愊掣，像係會被著驚浸死。
6 𠊎講：「真希望𠊎有翼胛，像月鴿仔一樣！𠊎就做得飛去尋休息个所在。
7 𠊎一定會飛到遠遠个地方，去曠野歇。
8 𠊎會遽遽尋一個避難所，好在該位閃避狂風暴雨。」
9 主啊，求你變亂敵人个腔口；因為𠊎看到城內有暴動㧯相爭。
10 佢等日夜在城牆頂高巡來巡去；城內充滿罪惡㧯災難。
11 逐所在有破壞个行動；街項充滿欺壓㧯奸詐。
12 若係對敵㩢耍𠊎，𠊎還有辦法忍受；若係敵人攻擊𠊎，𠊎還做得閃避佢。
13 無想到係你—𠊎个同伴，𠊎个知己，𠊎親密个朋友！
14 𠊎等識互相交談到盡有搭碓，𠊎等識同眾人共下在聖殿敬拜交陪。
15 願𠊎个仇敵忽然死掉！願佢等生生跌落陰間！因為佢等个屋下㧯心肝攏總充滿邪惡。
16 總係，𠊎愛求喊上帝；上主一定會拯救𠊎。
17 無論朝晨、當晝、暗晡頭，𠊎緊求喊、又緊透大氣；佢一定會聽𠊎个噌聲。
18 雖然有一大群个敵人同𠊎相㓾，佢會拯救𠊎平安對戰場倒轉來。
19 上帝對古早就一直係掌權者；佢一定會聽到，使佢等降服，因為佢等毋肯改變，也毋驚上帝。
20 𠊎个同伴攻擊朋友；佢違背自家个契約。
21 佢个嘴比乳油較滑，總係心肚想个係爭鬥。佢个話比油還較軟，其實係挷出个利劍。
22 你應當將重擔交給上主，佢就會扶持你；佢永遠毋會俾義人失敗。
23 總係上帝啊，你愛將兇惡个人㧒落陰間；你愛使行事詭詐个人夭折。論到𠊎，𠊎愛全心信靠你。