Bible

1 上帝啊，求你憐憫𠊎，因為你有不變个慈愛！求你拭掉𠊎个過犯，因為你有豐盛个慈悲！ 2 求你洗掉𠊎个罪過，洗淨𠊎一切个罪惡！ 3 因為，𠊎知自家个過犯；𠊎个罪惡常在𠊎面前。 4 𠊎所犯个罪就係獨獨得罪你；𠊎所做个係你看做邪惡个事。所以，你審判𠊎係理所當然个；你責罰𠊎也係𠊎罪有應得个。 5 𠊎一出世就係罪人，還在母胎已經有罪。 6 你所要求个係內在个誠實；求你教𠊎，使𠊎心中得到智慧。 7 求你拭掉𠊎个罪，使𠊎得到淨浰；求你洗淨𠊎，使𠊎比雪較白。 8 求你俾𠊎聽到歡喜快樂个聲；雖然你有打碎𠊎，求你使𠊎重新得到快樂。 9 求你揞面，毋好看𠊎个罪，拭掉𠊎一切个罪惡。 10 上帝啊，求你為𠊎造純潔个心，賜給𠊎全新㧯忠誠个靈。 11 求你毋好逐𠊎離開你个面前；毋好將你个聖靈對𠊎收轉去。 12 再一擺將你救恩个歡喜賜給𠊎，使𠊎个靈樂意來順服你。 13 恁樣，𠊎愛將你个道路指示罪人；佢等就會歸順你。 14 上帝啊，你係拯救𠊎个上帝；求你赦免𠊎个死罪；𠊎就愛大聲歌頌你个公義。 15 主啊，求你開𠊎个嘴，𠊎就會傳揚你个好名聲。 16 你無歡喜祭物，若係愛，𠊎就會獻；燒化祭也毋係你所合意个。 17 上帝啊，𠊎所獻个祭就係憂傷破碎个靈；上帝啊，憂傷悔改个心，你毋會拒絕。 18 上帝啊，求你用慈愛好款待錫安；求你重建耶路撒冷个城牆。 19 該時，你就會悅納公義个牲儀㧯全牲个燒化祭；該時，就會有公牛獻在你个祭壇頂。