Bible

1 有權勢个人啊，你做麼介誇口所做个壞事呢？上帝个慈愛係永遠毋會改變个。 2 你个舌乸像磨利个剃頭刀；你一直製造是非傷害別人。 3 你好邪惡，惱良善；你愛虛假，恨真理。 4 你這個花撩牯啊，樣恁愛中傷別人！ 5 因為恁樣，上帝愛徹底消滅你；佢愛捉你，將你對屋下揪出來，將你對世人中連頭帶根挷掉。 6 義人看到就會著驚；佢等會笑你，講： 7 「看啊，這就係無倚靠上帝个人；佢倚靠自家个錢多，做壞事堅立自家。」 8 總係𠊎，𠊎像種在上帝屋下茂盛个橄欖樹；𠊎永永遠遠倚靠上帝不變个慈愛。 9 上帝啊，𠊎愛永遠感謝你所做个一切；𠊎愛在你忠心个子民中傳揚你个好名聲。