Bible

1 義人啊，你等愛因為上主歡喜唱歌；正直个人啊，你等頌讚佢係應當个。 2 愛彈琴感謝上主，用十弦琴歌頌佢。 3 愛唱新个詩歌讚美佢；愛彈到盡好，大聲來唱。 4 因為上主个話正直；佢所做个全部信實。 5 上主歡喜正義㧯公平；佢不變个慈愛充滿全地。 6 諸天係通過上主个命令來創造个；日、月、星辰也係通過佢个話造成个。 7 佢將海水聚集共下；佢用大海來做水庫。 8 願全世界敬畏上主！願世間个萬民驚佢！ 9 佢一出聲就有世界；佢一命令萬有就企在。 10 上主破壞萬國个陰謀；佢使萬民个計謀失效。 11 上主个計劃永遠長存；佢个旨意萬代不變。 12 尊上主做上帝个國家實在有福氣！佢所揀選歸屬佢个子民真有福氣！ 13 上主對天頂看下來；佢看到全世界个人。 14 佢對自家个寶座看等世間个萬民。 15 人个心全部係佢造个；人个行為佢全部鑒察。 16 君王得勝毋係靠兵刀；戰士打贏毋係靠力大。 17 靠戰馬來得勝係妄想；馬个力大無辦法救人。 18 上主親眼看顧敬畏佢个人；佢看顧仰望佢慈愛个人。 19 佢救佢等，使佢等脫離死亡，天旱个時，保留佢等个性命。 20 𠊎等心所仰望个就係上主；佢幫助𠊎等，做𠊎等个盾牌。 21 𠊎等个心愛因為佢歡喜，因為𠊎等信靠佢个聖名。 22 上主啊，𠊎等仰望你；願你不變个慈愛㧯𠊎等同在！