Bible

1 𠊎愛常常頌讚上主；𠊎个嘴愛一直讚美佢。 2 𠊎个心愛因為上主來誇口；願受迫害个人聽了就歡喜。 3 來同𠊎共下傳揚上主个偉大；𠊎等共下來頌讚佢至高个名。 4 𠊎尋求上主，佢就應𠊎，救𠊎脫離一切个著驚。 5 仰望佢个人就有光明；佢等毋會再滿面見笑。 6 這困苦人求喊，上主就垂聽，救佢脫離一切个患難。 7 上主个使者保佑敬畏佢个人，在佢等周圍紮營來拯救佢等。 8 上主个美善你等愛嘗看仔！倚靠佢个人實在真有福氣！ 9 上主个聖民啊，愛敬畏上主！敬畏佢个人無欠半項。 10 就係獅仔也有欠缺㧯肚飢个時節，總係尋求上主个人麼介好處都毋會欠。 11 後生人啊，你等愛來聽𠊎講！𠊎愛教你等樣般敬畏上主。 12 有人愛惜生命麼？追求長壽福樂麼？ 13 莫俾你个舌乸出惡言；莫俾你个嘴唇講詭詐。 14 愛棄絕邪惡，做好事；愛追求和平，煞猛行。 15 上主个目珠看顧義人；佢个耳公聽佢等求喊。 16 上主對做壞事个人變面，愛對世間除掉佢等个名。 17 義人求喊上主，佢就聽，救佢等脫離一切患難。 18 上主親近灰心失志个；佢拯救心靈受苦个人。 19 義人有盡多苦難，總係上主愛救佢脫離這一切。 20 上主愛保全佢个骨頭，連一支也毋會被人打斷。 21 罪惡會害死邪惡人；恨義人个愛受責罰。 22 上主愛救贖佢僕人个性命；倚靠佢个人全部毋會受責罰。