Bible

1 上主啊，𠊎求喊个就係你！𠊎个磐石啊，求你莫塞等耳公毋聽𠊎！你若係繼續恬恬毋搭𠊎，𠊎會像別人共樣落陰間。 2 求你聽𠊎个求喊來幫助𠊎！𠊎向你个至聖所擎手祈禱，該時，求你憐憫𠊎，聽𠊎懇求！ 3 莫將𠊎同壞人共下定罪，抑係同作惡个人共下除掉；佢等㧯鄰舍講話盡和氣，總係佢等个心充滿奸詐。 4 求你責罰佢等个行為，照佢等个邪惡對待佢等；求你照佢等雙手所做个，照佢等應得个報應佢等。 5 因為佢等藐視上主个作為，又看輕佢个手所做个工作；所以，上主愛毀壞佢等，使佢等永遠興毋起來。 6 上主係應當得到頌讚个，因為佢聽𠊎求憐憫个聲。 7 上主係𠊎个力量，𠊎个盾牌；𠊎全心信靠佢，就得到幫助。𠊎个心歡喜快樂，𠊎愛唱歌感謝佢！ 8 上主係佢子民个力量；佢庇佑拯救佢所選立个王。 9 上主啊，拯救你个子民，賜福給屬你自家个人。求你牧養佢等，扶持佢等，直到永遠。