Bible

1 願頌讚歸給上主—𠊎个磐石！佢訓練𠊎个手戰爭，訓練𠊎个手指相㓾。 2 佢係𠊎慈愛个主，𠊎个城堡，𠊎个避難所，𠊎个拯救者，𠊎个盾牌，𠊎所倚靠个；佢使列國降服𠊎。 3 上主啊，人算麼介哪？你關心佢！會朽壞个人算麼介？你顧念佢！ 4 人像一口氣定定；佢个年日就像影飛等過去。 5 上主啊，求你打開天，親自降臨；求你摸該兜山，使山出煙。 6 求你發出𥍉爧，趕散仇敵；求你射出箭，使佢等混亂。 7 求你對天頂伸手救𠊎，對大水个當中拯救𠊎，救𠊎脫離外來个強敵。 8 佢等个嘴專門講花撩，擎右手發誓也係虛假。 9 上帝啊，𠊎愛對你唱新歌；𠊎愛彈十弦琴來頌讚你！ 10 使眾王得勝个就係你；你拯救你个僕人大衛。 11 求你救𠊎脫離殘暴个刀劍，救𠊎脫離該兜外來个強敵。佢等个嘴專門講花撩，擎右手發誓也係虛假。 12 願𠊎等个孻仔在後生个時就盡紮磳像大樹；願𠊎等个妹仔美貌像宮殿轉角雕刻个石柱。 13 願𠊎等个倉庫滿滿，囤各種个五榖；願𠊎等牧場个羊群生產千千萬萬。 14 願𠊎等个牛群繁殖多多，無落胎个，也無被人搶走。願𠊎等个街項無大噭聲。 15 享受這種情況个國家實在有福氣！尊上主做佢等个上帝，這人民係樣般有福氣啊！