Psalms 119
1 行為無好嫌、遵行上主教示个，這種人實在有福氣噢！
2 聽從上主个法令、全心尋求佢个，這種人實在有福氣噢！
3 這種人絕對毋做壞事；單單遵行上主个道路。
4 上主啊，你頒佈教訓給𠊎等，喊𠊎等認真遵行。
5 𠊎真希望能行事堅定，遵行你所規定个！
6 𠊎若看重你所有个誡命，就毋會堵到見笑。
7 𠊎緊學會你公正个法則，就會用正直个心頌讚你。
8 𠊎愛遵行你个規則；求你毋好放掉𠊎！
9 後生人愛樣般過純潔个生活啊？就係愛遵行你个話！
10 𠊎全心尋求你；求你毋好俾𠊎違背你个誡命。
11 𠊎將你个話記在心中，免得𠊎得罪你。
12 上主啊，𠊎頌讚你！求你教𠊎你个規則。
13 𠊎愛大聲傳揚你所立一切个法則。
14 𠊎喜愛你个法令，贏過一切个財寶。
15 𠊎默想你个教訓；𠊎看重你个道路。
16 𠊎非常歡喜你个規則；𠊎毋會毋記得你个話。
17 求你恩待你个僕人，賜𠊎生命來遵行你个話。
18 求你打開𠊎个目珠，使𠊎看出你教示中奧妙个真理。
19 𠊎在世間做人客；求你毋好對𠊎囥等你个誡命。
20 𠊎个心時常著急，當渴慕你个法則。
21 你責備驕傲个人，咒詛悖逆你誡命个人。
22 求你除掉𠊎所受个羞辱㧯藐視，因為𠊎謹守你个法令。
23 雖然統治者坐共下，想盡辦法愛害𠊎，𠊎係你个僕人，還係愛默想你个規則。
24 你个法令使𠊎歡喜，係𠊎个良師益友。
25 𠊎个生命險險歸土；求你照你个應許使𠊎返生！
26 𠊎告白𠊎所行个，你就應𠊎；求你教𠊎你个規則！
27 求你使𠊎了解你个教訓；𠊎愛默想你奇妙个作為。
28 𠊎憂愁到緊流目汁；求你照你个應許使𠊎堅強起來。
29 求你使𠊎離開虛假个路，開恩將你个教示賜給𠊎。
30 𠊎所選个係真理个路；𠊎將你个法則擺在面前。
31 上主啊，𠊎堅持遵行你个法令；求你毋好俾𠊎堵到見笑。
32 𠊎非常熱心遵行你个誡命，因為你使𠊎个心大有智慧。
33 上主啊，求你將你規則个意義教𠊎；𠊎願意遵行到底。
34 求你使𠊎明白你个教示；𠊎就一心遵行。
35 求你帶𠊎行你誡命个路，因為這係𠊎所歡喜个。
36 求你使𠊎樂意遵行你个法令，贏過愛慕錢財。
37 求你使𠊎無看重虛空个事；求你俾𠊎行你个道路，換新𠊎个生命。
38 你對敬畏你个人所應許个，求你實現在你个僕人身上。
39 求你使𠊎所驚个羞辱離開𠊎，因為你个法則恁好。
40 你个教訓係𠊎所渴慕个；求你因為你个公義賜𠊎新生命！
41 上主啊，求你對𠊎顯出你个慈愛，求你照你个應許拯救𠊎；
42 𠊎就有話好應侮辱𠊎个人，因為𠊎信靠你个話。
43 求你使𠊎个嘴無離開真理，因為𠊎个希望係在你个法則。
44 𠊎愛繼續遵行你个教示，直到永永遠遠。
45 𠊎會自由自在來生活，因為𠊎遵行你个教訓。
46 𠊎會對君王講論你个法令，𠊎也毋會堵到見笑。
47 𠊎遵行你个誡命就盡快樂，因為𠊎愛慕你个誡命。
48 𠊎尊重又愛慕你个誡命；𠊎也愛默想你个規則。
49 求你記得你對僕人个應許，因為你个話使𠊎得到希望。
50 就係在患難中𠊎也得到安慰，因為你个應許換新𠊎个生命。
51 驕傲个人一直盡命侮辱𠊎，總係𠊎毋識偏離你个教示。
52 𠊎記得你早先个法則；上主啊，你个法則使𠊎得到安慰。
53 看到壞人棄絕你个教示，𠊎就心火大𤏸。
54 𠊎在世上做人客；你个規則成做𠊎个詩歌。
55 上主啊，連暗晡時𠊎也紀念你个名；𠊎愛謹守你个教示。
56 順從你个教訓，就係𠊎个快樂。
57 上主啊，你係𠊎个福份；𠊎決心愛遵行你个話。
58 𠊎全心求你開恩，求你照你个應許憐憫𠊎！
59 𠊎反省自家所行个路，就轉向你个法令。
60 𠊎遵行你个誡命，毋敢停跎延遲。
61 做壞事个人用索仔捆等𠊎，𠊎還係無毋記得你个教示。
62 因為你公義个法則，𠊎半夜䟘起來感謝你。
63 敬畏你、順從你教訓个人，全部係𠊎个朋友。
64 上主啊，你个慈愛充滿全地；求你教𠊎你个規則。
65 上主啊，照你所應許个，你一直好款待你个僕人。
66 求你賜𠊎智慧㧯智識，因為𠊎信從你个誡命。
67 你責罰𠊎以前，𠊎常常行差路，總係這下𠊎遵行你个話。
68 你係至善，所行个全係好事；求你教𠊎你个規則。
69 驕傲个人講花撩攻擊𠊎，𠊎還係一心一意遵守你个教訓。
70 佢等个心懵懵懂懂；總係𠊎盡歡喜你个教示。
71 𠊎所受个責罰對𠊎有利益，因為會使𠊎學習你个規則。
72 你頒佈个教示係𠊎个寶貝，贏過千千萬萬个金銀。
73 係你个手創造𠊎，又扶持𠊎；求你給𠊎智慧，好學習你个誡命。
74 敬畏你个人一看到𠊎就歡喜，因為𠊎仰望你个話。
75 上主啊，𠊎知你个審判盡公當；你責罰𠊎，係照你个信實。
76 求你照你對僕人所應許个，用你个慈愛安慰𠊎。
77 求你憐憫𠊎，留𠊎个命，因為𠊎盡歡喜你个教示。
78 願該兜驕傲个人見笑；佢等無緣無故冤枉𠊎；論到𠊎，𠊎愛默想你个教訓。
79 願該兜敬畏你个人轉𠊎這位來，認識你法令个人愛同𠊎共下。
80 願𠊎一心一意遵行你个規則，恁樣𠊎正毋會致到見笑。
81 𠊎个心渴慕你个救恩，𠊎仰望你个話。
82 𠊎个目珠盼望你个應許到花掉；𠊎緊問講：「你幾時正愛安慰𠊎呢？」
83 雖然𠊎像一隻舊个爛酒袋，𠊎還係無毋記得你个規則。
84 你个僕人還愛等幾久呢？你幾時正愛審判迫害𠊎个人呢？
85 驕傲个人挖陷阱愛害𠊎；佢等係毋遵守你教示个人。
86 你个誡命全部信實可靠！該兜人無緣無故迫害𠊎；求你幫助𠊎！
87 佢等險險將𠊎對世間除掉，總係𠊎還係無離開你个教訓。
88 求你照你个慈愛救𠊎个生命，好使𠊎遵行你所頒佈个法令。
89 上主啊，你个話永遠長存，在天頂非常堅定。
90 你个信實萬代長存；你建立地，地就一直存在。
91 萬有照你个安排，到今還在，因為萬物係你个奴僕。
92 𠊎若毋係歡喜你个教示，早就在苦難中滅亡囉！
93 𠊎永遠毋會毋記得你个教訓，因為你通過它兜賜𠊎生命。
94 𠊎係屬你个，求你救𠊎，因為𠊎尋求你个教訓。
95 壞人等等愛將𠊎滅掉，𠊎還係思想你个法令。
96 𠊎看出一切圓滿个事還係有限；唯有你个誡命係無窮个。
97 𠊎係樣般愛慕你个教示啊！𠊎歸日默想它。
98 你个誡命時常在𠊎个心中，使𠊎比仇敵較聰明。
99 𠊎比𠊎所有个先生還較靈通，因為𠊎默想你个法令。
100 𠊎比老人家較有智慧，因為𠊎遵守你个教訓。
101 𠊎棄絕一切个壞行為，因為𠊎愛遵守你个話。
102 𠊎無離開你个法則，因為教導𠊎个係你。
103 你个話對𠊎來講實在真甜，在𠊎口中比蜂糖還較甜！
104 你个教訓使𠊎明白是非，所以𠊎怨恨一切壞行為。
105 你个話係𠊎腳前个燈，係𠊎路上个光。
106 𠊎識發誓，一定愛遵守，愛遵行你公義个法則。
107 上主啊，𠊎所受个苦盡重；求你照你个應許換新𠊎个生命。
108 上主啊，接納𠊎感謝个祈禱；求你教𠊎你个法則。
109 𠊎个生命時常有危險，總係𠊎無毋記得你个教示。
110 壞人設羅網來害𠊎，𠊎還係無偏離你个教訓。
111 你个法令係𠊎永久个產業，係𠊎心肝所歡喜个。
112 𠊎決心遵行你个規則，直到𠊎離開這世間。
113 𠊎怨恨心懷兩意个人；𠊎愛慕个係你个教示。
114 你係𠊎个避難所，𠊎个盾牌；𠊎仰望你个話。
115 作惡个人啊，離開𠊎！𠊎愛遵守𠊎上帝个誡命。
116 求你照你个應許扶持𠊎、留𠊎个命；求你毋好使𠊎失望見笑。
117 你扶持𠊎，𠊎就會得救；𠊎愛時常注意你个規則。
118 你棄絕偏離你規則个人；佢等所圖謀个全係虛空。
119 你看世上个壞人做垃圾，所以𠊎愛慕你个法令。
120 𠊎驚你到歸身愊愊掣；𠊎盡驚你个審判。
121 𠊎一直照公正㧯公義行事；求你毋好俾𠊎落在仇敵个手中！
122 求你保證你僕人个幸福；求你毋好俾驕傲个人欺負𠊎！
123 因為盼望你个救恩、等候你所應許个拯救，𠊎个目珠望到花掉。
124 求你照你个慈愛恩待你个僕人；求你教𠊎你个規則。
125 𠊎係你个僕人；求你賜𠊎智慧，使𠊎明白你个法令。
126 上主啊，你審判个時間到了，因為人全部悖逆你个教示。
127 𠊎愛慕你个誡命贏過黃金，甚至贏過精練个純金；
128 所以，𠊎順從你一切个教訓；𠊎也盡惱一切虛假个行為。
129 你个法令實在奇妙，所以𠊎全心順服。
130 你个話一解釋就發出光，使單純个人得到智慧。
131 𠊎嘴勺勺、氣急急，因為𠊎渴慕你个誡命。
132 求你轉身向𠊎，憐憫𠊎，像你對該兜敬愛你个人恁樣。
133 求你照你个應許使𠊎腳步穩定，莫俾罪惡轄制𠊎。
134 求你救𠊎脫離壓制𠊎个人，使𠊎有好遵行你个教訓。
135 求你面向你个僕人，光照𠊎；求你教𠊎你个規則。
136 𠊎个目汁像河壩水流等下，因為人毋肯遵守你个教示。
137 上主啊，你係公義个；你个法則係公正个。
138 你所頒佈个法令，完全公義，絕對可靠。
139 𠊎當譴，火盡大，因為𠊎个仇敵看輕你个話。
140 你个應許完全純真，係你个僕人所愛慕个。
141 𠊎盡卑賤又被人看輕，總係𠊎無毋記得你个教訓。
142 你个公義永遠長存；你个教示就係真理。
143 𠊎堵到患難㧯困苦，總係你个誡命帶給𠊎快樂。
144 你个法令永遠公正；求你使𠊎了解，留𠊎个生命。
145 上主啊，𠊎全心求喊，求你應𠊎；𠊎一定會順從你个規則。
146 𠊎求喊你，求你拯救𠊎；𠊎一定會遵行你个法令。
147 天吂光𠊎就䟘起來求喊你；𠊎仰望你个話。
148 𠊎歸夜目金金，默想你个應許。
149 上主啊，求你照你个慈愛聽𠊎个祈求；求你照你个公義賜𠊎新生命。
150 用詭計迫害𠊎个人已經接近𠊎；佢等遠離你个教示。
151 總係，上主啊，你在𠊎个身邊；你个誡命逐句係真理。
152 𠊎早就學習你个法令；𠊎知你使它兜永遠堅定。
153 求你重視𠊎所受个苦難，求你救𠊎，因為𠊎毋識忽略你个教示。
154 求你為𠊎伸冤，透放𠊎；照你个應許救𠊎个命。
155 救恩離開壞人盡遠，因為佢等毋尋求你个規則。
156 總係，上主啊，你个慈悲極大；求你照你个公義賜𠊎新生命。
157 迫害𠊎、對敵𠊎个人盡多，𠊎還係無偏離你个法令。
158 𠊎看到悖逆个人就盡惱，因為佢等毋遵守你个話。
159 上主啊，你看𠊎樣般愛慕你个教訓！求你照你不變个慈愛救𠊎个生命！
160 你个話全部係真理；你公義个法則攏總存到永遠！
161 該兜有權勢个人無緣無故迫害𠊎，總係𠊎个心尊重你个話。
162 𠊎因為你个應許非常歡喜，像人發現多多个寶物。
163 虛虛假假係𠊎所怨恨、𠊎所惱个，總係你个教示係𠊎所愛慕个。
164 因為你公義个法則，𠊎逐日讚美你七擺。
165 愛慕你教示个人會有大平安，無麼介能使佢等跌倒。
166 上主啊，𠊎等候你个拯救；𠊎遵行你个誡命。
167 𠊎遵守你个法令；𠊎全心愛慕它兜。
168 𠊎遵行你个教訓㧯法令，因為你清楚𠊎一切个行為。
169 上主啊，願𠊎个求喊達到你面前；求你照你个話賜給𠊎智慧。
170 願𠊎个祈禱達到你面前；求你照你个應許拯救𠊎。
171 𠊎个嘴愛時常讚美你，因為你教𠊎你个規則。
172 𠊎个舌乸愛唱歌頌讚你个應許，因為你个誡命全部係公義个。
173 求你隨時伸手幫助𠊎，因為𠊎決心遵從你个教訓。
174 上主啊，𠊎渴慕你个救恩！你个教示係𠊎所歡喜个。
175 求你留𠊎个命，好使𠊎讚美你！願你个法則幫助𠊎！
176 𠊎像迷失个羊行毋著路；求你來尋你个僕人，因為𠊎毋識毋記得你个誡命。