Proverbs 5
1 孻仔啊，愛看重𠊎个智慧，愛認真聽𠊎聰明个話語；
2 恁樣，你就會謹慎行事，你个嘴唇會滿有智識。
3 淫婦个嘴唇滴下蜂糖，姖个嘴比橄欖油較滑；
4 總係最尾姖比黃蓮較苦，也比兩邊个刀劍還較利。
5 姖个腳行死亡个路；姖个腳步直向陰間。
6 姖無注意行生命个路，腳步行差，自家乜毋知。
7 孻仔啊，這下愛聽從𠊎；你等毋好違背𠊎个話。
8 愛遠遠離開淫婦！千萬毋好行近姖个門口！
9 驚怕你會將好名聲送給別人，將青春个年日交給兇惡个人；
10 驚怕生份人就來搶走你个財產，你勞碌得來个會落入外人个家。
11 你臨終个時，血氣消盡，會緊噌無停，講：
12 「𠊎做麼介恁怨恨管教？𠊎个心樣會藐視勸話？
13 𠊎當時毋聽師傅个話，完全毋搭𠊎該兜先生。
14 𠊎這下在公共場所眾人个面前，見笑到會死！」
15 你愛啉自家陂塘中个水，啉你自家井肚流出个水。
16 你个泉源敢做得流到街項？你个泉水敢做得湧到廣場？
17 你个泉源愛單單歸屬你；絕對做毋得㧯外人摻雜。
18 願你个泉源蒙福；願你歡喜後生時所討个𡜵娘。
19 姖像得人惜又當靚个鹿仔；願姖个胸懷時常使你心滿意足，願姖个愛情一直使你神魂顛倒。
20 孻仔啊，做麼介愛被別个婦人家迷到？做麼介愛揇淫婦个胸懷？
21 人所行个道，在上主眼前；人一切个路，佢攏總鑒察。
22 邪惡人个罪像羅網，將自家捆到𢫮𢫮；佢所犯个罪像索仔，將自家纏到死死。
23 佢因為毋受管教，就喪失生命；因為戇檔至極，佢必定行差路。