Proverbs 27
1 毋好為天光日來誇口，因為一日會發生麼介事你都毋知。
2 毋好講自家恁會，愛等別人誇獎你；毋好自誇，愛等毋熟事个人稱讚你。
3 石頭㧯沙仔兩項盡重，總係戇檔人惹起个患難還較重。
4 發譴會害人，發閼會傷人，嫉妒若來到，麼人擋得住？
5 公開个責備贏過囥等个愛心。
6 朋友傷害你係出於忠誠；仇敵反轉㧯你連連唚嘴。
7 食飽个人，連蜂糖佢乜無想食；肚飢个人，連苦个也感覺盡甜。
8 離家出外流浪个人，就像鳥仔離藪遠飛。
9 香油㧯香料俾人个心當爽快；朋友真心个勸話也係恁甘甜。
10 毋好㧒掉你个朋友㧯若爸个朋友；堵到災難个時毋使向親人求幫助，因為遠親不如近鄰。
11 孻仔啊，愛做智慧人來使𠊎歡喜，使𠊎有話好應嘲謔𠊎个人。
12 精明个人看到危險就閃開；戇直个人直頭直路受災害。
13 麼人為生份人擔保，你就愛拿佢个外衫做抵押；麼人為外族人擔保，你就愛喊佢承擔一切後果。
14 打早䟘床吵醒朋友，大聲為佢祝福，當像係咒詛佢。
15 㘙㘙唸唸个𡜵娘，㧯滴滴𣽛𣽛个落雨天共樣；
16 想愛禁止姖个，像愛攔阻狂風，也像右手揢油。
17 朋友互相研究，像鐵磨鐵越磨越利。
18 照顧無花果樹个，有無花果好食；服事主人个，也能得到尊榮。
19 靜水能照面，面面相對；人心對人心，也係恁樣。
20 陰間㧯滅亡个深淵一直坉毋會滿；人个慾望也共樣永遠無辦法滿足。
21 爐火鍛鍊金銀，稱讚考驗人品。
22 你就係將戇人放在舂臼肚，㧯麥仔共下舂碎，戇檔還係離毋開佢。
23 愛小心看好你个羊群，愛細膩照顧你个頭牲；
24 因為錢財毋係永久能保存，冕旒也毋會存到世世代代。
25 燥草割掉，嫩草出現，山邊野草收集个時，
26 你做得剪羊毛做衫褲，用賣山羊个錢買土地；
27 山羊乳會罅你一家人食，又好維持你使女个生活。