Proverbs 28
1 邪惡人雖然無人追也在逃命；總係正直人像獅仔無驚麼介。
2 國家充滿罪惡，掌權者就緊換；國有賢明領袖，政權正能長久。
3 大官欺負窮苦人，像大水打走五榖。
4 毋守法律个講壞人當會；遵守法律个㧯佢等對抗。
5 壞人毋知麼介係正義；尋求上主个明白一切。
6 行為純正个窮苦人，贏過奸詐个好額人。
7 遵守法律个就係聰明个孻仔；㧯好食懶做个人結朋友，會使厥爸見笑。
8 靠高利息成做好額人，佢个錢財到尾會落在憐憫窮苦人个手中。
9 人若係塞耳毋肯聽教示，連佢个祈禱上帝也盡惱。
10 引誘正直人行邪惡个路，這人會跌落自家个陷阱；總係純潔个人會得福份。
11 好額人恅到自家盡有智慧；明理个窮人看穿佢个虛假。
12 正直人掌權，人人大歡喜；邪惡人興起，儕儕走去囥。
13 將自家罪過遮等个，毋會成功；承認過失來悔改个，上帝會憐憫佢。
14 常常敬畏上主實在有福氣；硬心硬殼个人會陷落災禍。
15 壞个執政者壓迫窮苦人，就像大聲吼吼滾个獅仔，也像肚當枵又當惡个熊。
16 無明理个執政者會成做暴君；無貪不義个錢財正會享長壽。
17 犯㓾人罪个，定著逃命到死；無論你係麼人，毋好幫助佢。
18 行為完全，得到拯救；做人奸詐，盡遽跌倒。
19 煞猛耕種，糧食充足；浪費光陰，難免窮苦。
20 誠實个人充滿幸福；想發橫財難免受罰。
21 做毋得偏心來看人个情面；總係有人為一垤餅去犯法。
22 顧賺錢想遽遽發財个，毋知窮苦跈等就到來。
23 勸話人个，到尾會得到歡迎，較贏該講話阿媚奉承人个。
24 偷拿爺𡟓个，又講：「這毋係罪」，這隻人㧯強盜無麼介差別。
25 自私个人惹起紛爭；倚靠上主的確豐盛。
26 心肝單單靠自家个，這就係戇人；照智慧行事做人个，會得到拯救。
27 救濟窮苦个，毋會缺乏；詐毋知个，會多受咒詛。
28 邪惡人掌權，儕儕走去囥；佢等滅亡，正直人就增加。