Proverbs 26
1 好名聲配戇檔人當毋登對，像夏天落雪秋收落雨共樣。
2 無理个咒詛像屋簷鳥㧯燕仔飛來飛去，毋會落在人个身項。
3 用皮鞭打馬，用嘴落駛驢，愛用棍仔打戇檔人个背囊。
4 毋好照戇人个戇話應佢，驚怕你也同佢共樣。
5 愛照戇人个戇話堵佢，免得佢恅到自家有智慧。
6 喊戇人傳話个，就像斬斷自家个腳，招來損害。
7 像瘸仔个腳全無路用，戇人講箴言也係恁樣。
8 將尊榮給戇人，像石頭䌈在彈弓上，射毋出去。
9 戇檔人講箴言，像酒醉个人拿等竻樹桍亂打人。
10 隨便請戇人㧯過路人做工个，會使所有个同工全部受損害。
11 戇檔人一擺又一擺做戇事，像狗回頭食牠所嘔出來个。
12 你看自家恅到有智慧个人嗎？連戇檔个人比佢還較有希望。
13 懶尸人留到屋下妄想講：「路項有獅仔，街項有獅仔！」
14 懶尸人賴床翻來翻去，就像門鉸仔轉來轉去。
15 懶尸个人伸手到盤肚拿食物，懶到連跔手送落嘴也嫌費氣。
16 懶尸人恅到自家比七個盡會應對人个還較有智慧。
17 去插無干涉自家个爭吵，就像揪到過路狗个耳公。
20 無柴來燒，火定著會烏掉；無人傳話，冤家就停下來。
21 好冤家个就會煽動紛爭，就像火堆添炭，火上加柴。
22 背後个閒話像食滂沛；一落嘴就吞到腸肚去。
23 嘴甜舌滑總係心肝邪惡，就像粗缶仔包一層白銀。
24 敵人講奉承人个話，總係心肚囥等奸詐。
25 聲音雖然溫柔，毋好相信佢，因為佢个心肝肚充滿惡毒。
26 雖然佢千方百計愛將佢个怨恨囥起來，總係佢个邪惡會在眾人面前顯露出來。
27 挖陷阱个，自家會跌落去；翻石頭个，會被石頭磡到。
28 虛假个舌乸害它所惱个人；阿媚奉承个嘴會帶來敗壞。