Proverbs 23
1 你㧯大人物共桌食飯个時節，愛記得坐在若面前个係麼人。
2 若係你飯量大，就愛約束自家。
3 毋好貪食佢个滂沛；驚怕這係佢个陰謀。
4 你愛聰明兜仔，莫過勞、死愛錢。
5 錢財一𥍉目就消失；因為錢財會生翼胛，就像鷂婆飛到天頂。
6 莫食齧擦人个飯，毋好貪佢个滂沛。
7 佢講：「毋使細膩，食啊，啉啊」，總係佢心肚另外有打算。佢做人，心肚專門計較錢。
8 你所食个一些東西會嘔出來；你所講个靚話也會變做空空。
9 你毋好講話給戇人聽；佢會藐視你智慧个話。
10 毋好徙古時个地界，毋好佔孤兒个田地；
11 因為佢等个保護者大有能力，佢愛做你个對頭，為佢等伸冤。
12 愛專心接受教訓，認真聽智識个話。
13 毋好毋管教細人仔；用竹修仔毋會打死；
14 你用竹修仔打佢，正會救佢个生命。
15 孻仔啊，你若有智慧，𠊎係樣般歡喜快樂！
16 你一講正直个話，𠊎个心肝就當暢！
17 你毋好嫉妒罪人，愛日夜敬畏上主；
18 恁樣，你个前途就光明，你个將來也毋會絕望。
19 孻仔啊，聽𠊎个話來得到智慧；愛留心行正路。
20 好啉酒个，貪食肉个，毋好同佢等做朋友；
21 因為好酒貪食个，會變窮苦人；好睡目个人，一定會著爛衫褲。
22 應該聽從𫱔你个爺𡟓；就算老了，也毋好看輕佢等。
23 你愛付代價來得到真理、智慧、教訓㧯見識；千萬毋好將它兜賣掉。
24 義人个爺仔，定著會非常快樂；孻仔有智慧，𫱔佢个就盡歡喜。
25 應當俾你个爺𡟓快樂；愛俾𫱔你个阿姆歡喜！
26 孻仔啊，愛全心向𠊎學習，愛注意看𠊎个模樣。
27 妓女係無底深坑；淫婦係致命陷阱。
28 姖等像埋伏个強盜，使更多个人變奸詐。
29 麼人有災禍？麼人有憂傷？麼人有相爭？麼人有埋怨？麼人無故受傷？麼人目珠赤赤？
30 就係該兜流連醉鄉，好酒貪杯个人。
31 毋好貪愛杯中又紅又靚、在喉嗹中又醇又順个酒。
32 最後酒會像蛇哥纏你，像毒蛇咬你。
33 你會目花花，頭昏昏，亂講話。
34 你會醉到浮浮，像在海中，又像睡在船个桅杆頂高。
35 你會講：「𠊎被人捶，毋會痛，被人打，無感覺。𠊎樣醒毋過來？𠊎愛再啉一杯！」