Proverbs 21
1 上主隨意指揮君王个心，就像佢轉變河流个方向。
2 人看自家所行个攏總著，總係上主查驗佢个動機。
3 行仁義㧯公平，比獻祭更蒙上主接納。
4 藐視个目珠，驕傲个心，壞人所耕種个，全係罪。
5 煞猛計劃个，一定會好額；行事急性个，必致到窮苦。
6 詐欺騙來个財寶，就像飄散个雲煙，又像死亡个羅網。
7 邪惡人个強暴行為將自家拖累到死，因為佢等毋肯照公平行事。
8 犯罪个人，路係彎曲；純潔个人，行為正直。
9 甘願單獨在屋頂个一角，無愛㧯潑婦共下住大屋。
10 邪惡人緊想做壞事；對鄰舍無憐憫个心。
11 傲慢人受到責罰，戇直人就得智慧；智慧人得到教育，佢就會增加智識。
12 公義者鑒察壞人个家；佢愛使邪惡个人滅亡。
13 耳公塞等毋聽窮苦人哀求个，佢將來求幫助也無人愛搭佢。
14 暗中送禮物能平息憤怒；貼後手也可以壓制烈怒。
15 實行公義，義人歡喜，作惡个人，驚到會死。
16 人若離開明理个路，會去同陰魂共下住。
17 歡喜宴樂，必致貧窮；貪食酒肉，不能富足。
18 邪惡人想愛陷害正直人，災禍反轉臨到自家身項。
19 甘願住在偏僻無人邸个曠野，無愛㧯好冤家个潑婦共下住。
20 智慧人屋下積存寶物㧯油；戇檔人一下得到就用淨淨。
21 盡心盡意愛行公義㧯仁慈，就會得到長壽公義㧯尊榮。
22 靠智慧正能佔領勇士掌个城，將佢等所倚靠个城堡搶過來。
23 人能謹慎佢所講个話，會保守自家免受災難。
24 驕傲又嘲謔人个，安到「傲慢人」；佢行事做人，時常過頭驕傲。
25 懶尸人个妄想會害死佢，因為佢个手毋願意做工；
26 佢歸日貪心到無限度；總係義人施捨，無齧擦。
27 上主盡恨壞人个獻祭；何況佢存壞意來獻呢！
28 做假見證个人，佢一定會大失敗；親耳聽實話个，佢个見證會成功。
29 邪惡人詐意有膽量；正直人行事有考慮。
30 人个智慧、聰明、謀略，攏總無法度㧯上主對抗。
31 人為到相㓾該日招兵買馬，總係輸贏全由上主來決定。