Philippians 4
1 𠊎所親愛、所想念个兄弟姊妹啊，你等係𠊎个歡喜，係𠊎个冕旒！𠊎所惜个啊，你等愛靠主企穩。
2 友阿蝶㧯循都基啊，𠊎懇求你等愛同心，就像信主个姊妹。
3 𠊎忠實个同伴啊，𠊎也求你幫助姖兩儕；因為姖等在福音个工作上同𠊎、革利免，㧯其他个同工識共下勞苦；這兜人个名全部已經記在上帝个生命冊。
4 你等愛因為同主結連來常常歡喜。𠊎再講，你等愛歡喜！
5 對所有个人，你等攏總愛顯出謙卑。主愛來了。
6 應當全無掛慮；凡事愛祈禱，將你等所需要个㧯上帝講，用感謝个心來祈求。
7 上帝所賜、該超過人所想像个平安，會通過基督耶穌保守你等个心懷意念。
8 兄弟姊妹啊，總講，你等愛時常留意該兜好德行㧯堪得稱讚个事。一切真實、高貴、公正、純潔、得人惜㧯光榮个事，你等全部愛看重。
9 你等對𠊎所學習，所領受，抑係所聽到，所看到个言行舉止，攏總愛實行出來。賜平安个上帝就會㧯你等同在。
10 𠊎在主个生命底背極歡喜！因為過恁久以後，這下你等又供給𠊎。其實，你等一直關心𠊎，總係無機會好表示定定。
11 𠊎恁樣講，毋係因為𠊎缺少麼介；𠊎已經學會滿足現況。
12 𠊎知樣般過窮苦个日仔，也知樣般過富足个生活。𠊎已經得到秘訣，隨時隨地，係飽係飢，豐富缺乏，𠊎攏總盡自在。
13 𠊎靠該賜給𠊎能力个，凡事都能做。
14 總係，𠊎在困難中，你等來幫助𠊎，實在係好事。
15 你等腓立比人知，在𠊎傳福音个初期，就係𠊎離開馬其頓个時節，在收支个事上，除了你等以外，並無別个教會㧯𠊎分擔。
16 連在帖撒羅尼迦个時，你等一再派人來供給𠊎个需要。
17 𠊎並無貪你等个禮物；𠊎所希望个就係你等賺加兜仔，好記在你等个帳項。
18 這就係你等送給𠊎一切禮物个收据；你等所送个超過𠊎所需要个。𠊎已經充足，因為𠊎對以巴弗提接受你等所送个禮物。它兜像清香个香味，係上帝所接納、所歡喜个祭物。
19 𠊎个上帝會照佢在基督耶穌底背偉大个豐盛，將你等所需要个一切賜給你等。
20 願榮耀歸給𠊎等个阿爸上帝，世世無窮！阿愐。
21 請代𠊎對各位屬基督耶穌个聖徒請安。同𠊎共下个眾兄弟姊妹也對你等請安。
22 所有个聖徒，特別係皇宮肚該兜人，全部對你等請安。
23 願主耶穌基督个恩典常在你等心內！