Philippians 3
1 兄弟姊妹啊，總講：你等愛因為同主結連來歡喜！𠊎將這兜話再寫給你等，對𠊎係無麻煩，對你等也係妥當。
2 你等愛提防該兜作惡个人，該兜狐群狗黨，就係該兜堅持愛割自家身體个人。
3 其實，接受真割禮个，毋係佢等，係𠊎等；因為𠊎等係通過上帝个靈來敬拜、所誇口个係基督耶穌、毋係倚靠外表个禮儀。
4 其實，𠊎也做得靠外表个禮儀。若係有人恅到佢做得靠外表个禮儀，𠊎還較做得恁樣做。
5 𠊎出世第八日就受割禮。𠊎生來就係以色列人，屬便雅憫支族，係血統純正个希伯來人。對遵守猶太教教規這點來講，𠊎係屬法利賽派；
6 對熱心來講，𠊎識迫害教會；對遵守法律就算係義來講，𠊎無麼介好被人責備个。
7 總係，頭擺𠊎認為有利益个一切，這下為到基督个緣故，𠊎全部看做係損害。
8 毋單淨恁樣，𠊎更將萬事攏總看做損害，因為𠊎看認識𠊎个主基督耶穌做最寶貴个。所以，𠊎將一切準做垃圾㧒掉，為到愛得到基督，
9 完全同佢結連。𠊎所有个毋係自家對守法律來得到个義，係通過信基督所領受个義；這個義係憑信心對上帝來領受个。
10 𠊎一切所盼望个就係認識基督，體驗佢復活个能力，分擔佢个苦難，效法佢个死，
11 希望對恁樣𠊎自家也會對死復活。
12 這毋係講𠊎已經成功，抑係已經完全了。𠊎繼續緊走，愛得到該獎賞；其實，為到愛使𠊎達成這個目標，基督耶穌已經先使𠊎歸屬佢。
13 兄弟姊妹啊，𠊎毋敢講𠊎已經得到該獎賞；𠊎只有專心一件事：就係毋記得後背，全力追求頭前个事。
14 𠊎向目標直直緊走，為到愛得到獎賞；這獎賞就係屬天个新生命，係上帝通過基督耶穌呼召𠊎去領受个。
15 所以，𠊎等中間所有靈性成熟个人，全部愛有這種个心志；若係你等有別樣个看法，上帝也會清清楚楚指示你等。
16 無論樣般，𠊎等愛照𠊎等一旦所遵守个規矩向前行。
17 兄弟姊妹啊，你等愛繼續效法𠊎。𠊎等已經為你等做榜樣；你等愛認真學該兜效法𠊎等个人。
18 𠊎已經勸你等好多擺，這下𠊎流目汁再一擺勸話你等：有兜人个行為使佢等成做基督十字架个仇敵。
19 佢等个結局係滅亡，因為佢等个神就係自家个肚笥。佢等拿自家見笑个事來誇口，所想个無一項毋係世間个事。
20 總係，𠊎等係天頂个公民；𠊎等一心等候𠊎等个救主，就係主耶穌基督對天頂降臨。
21 佢愛用使萬有歸服佢个能力，來改變𠊎等軟弱會死个身體，使𠊎等同佢共樣，有榮光个身體。