Leviticus 10
1 亞倫个孻仔拿答㧯亞比戶各拿自家个香爐，點火，燒香，將它獻給上主。總係這係無合法个火，因為上主並無命令佢等做這個事。
2 忽然，就有火對上主面前出來，將佢等燒滅，佢等就死在上主面前。
3 所以，摩西對亞倫講：「這就係上主所講个：『在親近𠊎个人中，𠊎愛顯出𠊎个神聖；在眾人面前，𠊎愛彰顯𠊎个榮光。』」亞倫就恬恬。
4 摩西喊亞倫个阿叔烏薛个孻仔米沙利㧯以利撒反來，對佢等講：「將你等親人个屍體扛出聖所，帶到營外去。」
5 佢等就遵照摩西个命令揪等屍體个衫褲，將屍體扛到營外去。
6 摩西對亞倫㧯佢个孻仔以利亞撒㧯以他瑪講：「你等做毋得俾頭那毛襛襛，也做毋得扯爛衫褲來表示哀傷。若無遵守這個話，你等一定會死；上主也會向全體人民發譴。總係，你等个親屬以色列全家做得為上主用火燒死人个事件哀傷。
7 你等做毋得離開聖帳篷門口；若係離開，你等一定會死，因為上主个聖油已經使你等分別為聖了。」所以佢等遵照摩西个話來做。
8 上主對亞倫講：
9 「你㧯你該兜孻仔啉淡酒抑係釅酒以後做毋得入去𠊎个聖帳篷；若係入去，你等一定會死。你等个後代一定愛永遠遵守這條例。
10 神聖㧯世俗个，禮儀上淨浰㧯無淨浰个，你等一定愛分別到清清楚楚。
11 𠊎—上主通過摩西頒佈个所有法律，你等愛教導以色列人。」
12 摩西對亞倫同佢賸个兩個孻仔以利亞撒㧯以他瑪講：「你等愛用獻給上主个火祭中所賸到个素祭做無酵餅，在祭壇堘食，因為這祭係至聖个。
13 你等愛在聖个所在食；因為在獻給上主个火祭當中，這係歸你等㧯你等子孫个份額。這就係上主給𠊎个命令。
14 你等㧯你等个子女做得食獻給上主个特別禮物，就係所搖个胸脯肉㧯所獻个後腿。你等愛在禮儀上淨浰个地方食這種肉。這係對以色列人所獻个平安祭分出來給你等㧯你等子孫个。
15 所獻个後腿㧯所搖个胸脯肉，佢等愛㧯火祭个油共下帶來，搖幾下獻給上主做搖祭。照上主个命令，這部份愛永遠歸你等㧯你等个子孫。」
16 摩西查問該隻贖罪祭个山羊牯，發現牠已經被人燒掉。佢就向亞倫賸个孻仔以利亞撒㧯以他瑪發譴，責備佢等：
17 「你等做麼介無在聖个所在食贖罪祭呢？這祭係至聖个。上主將牠賜給你等，愛你等擔當全體人民个罪孽，在上主面前為佢等贖罪。
18 既然這牲儀个血無帶入聖所底背，你等就應該照𠊎个命令在聖所底背食這祭肉。」
19 亞倫應摩西講：「今晡日人民獻佢等个贖罪祭㧯燒化祭給上主，總係𠊎堵到這種災難。就算𠊎今晡日食掉贖罪祭个祭物，這會使上主接納麼？」
20 摩西聽了這話，認為佢講个有理。