Leviticus 9
1 到第八日，摩西召集亞倫㧯佢該兜孻仔，並以色列該兜長老來。
2 佢㧯亞倫講：「你愛擇一隻無缺點个細牛牯來做贖罪祭，一隻無缺點个綿羊牯做燒化祭獻給上主。
3 然後，你愛對以色列人講：『你等愛擇一隻山羊牯來做贖罪祭，又擇一歲大、無缺點个細牛牯㧯細綿羊牯各一隻做燒化祭，
4 又擇一隻牛牯㧯一隻綿羊牯做平安祭。你等愛將這兜㧯攪橄欖油个素祭全部獻給上主，因為今晡日上主愛向你等顯現。』」
5 所以，佢等將摩西吩咐佢等个全部帶到聖帳篷前；全體人民聚集在該位，企在上主面前。
6 摩西講：「上主命令你等做這所有个事，係愛向你等顯現佢个榮光。」
7 接等，摩西對亞倫講：「你愛到祭壇前獻你个贖罪祭㧯燒化祭，為你自家㧯人民贖罪；你又愛獻人民个祭，為佢等贖罪，全部照上主所命令个。」
8 所以，亞倫行到祭壇前，㓾死細牛牯做佢自家个贖罪祭。
9 佢該兜孻仔將血帶到佢面前，佢就用手指搵血，將血膏在祭壇个四角頂，賸到个血全部倒在祭壇个腳該位。
10 接等，佢照上主通過摩西宣佈个命令將贖罪祭个油、兩隻腰仔，㧯肝个網油全部放在祭壇頂燒獻。
11 佢又將牛个肉㧯皮帶到營外燒掉。
12 亞倫也㓾死為自家獻燒化祭个頭牲。佢該兜孻仔將血帶到佢面前，佢就將血洒在祭壇四周圍。
13 然後，佢等將燒化祭个肉一垤一垤、連頭交給佢，佢就將這兜放在祭壇頂燒。
14 佢又洗淨腹內㧯後腿，擺在燒化祭頂燒獻。
15 接下去，亞倫為人民獻祭。佢將為人民贖罪个山羊牯牽過來，㓾死，然後照佢為自家獻贖罪祭个方法獻該隻山羊牯。
16 佢又牽燒化祭个頭牲過來，照條例將牠奉獻。
17 佢也獻素祭，對中間扡一揢放在祭壇頂燒。(除了逐朝晨个燒化祭以外，再獻這祭。)
18 佢㓾死牛牯㧯綿羊牯，為人民獻平安祭。亞倫該兜孻仔將血帶到佢面前，佢就將血洒在祭壇四周圍。
19 佢等將牛牯㧯綿羊牯个油，包含肥个尾、包等腹內个油、兩隻腰仔、㧯肝个網油，
20 全部放在牲儀个胸脯頂，帶到佢面前。亞倫就將這兜油燒在祭壇頂，
21 又遵照摩西个命令將胸脯肉㧯右後腿搖幾下做搖祭獻給上主。
22 亞倫獻贖罪祭、燒化祭、㧯平安祭以後，就擎手祝福人民，然後對祭壇頂下來。
23 摩西㧯亞倫入去聖帳篷，再對該位出來，祝福人民。這時，上主个榮光向全體民眾顯現。
24 有火對上主面前出來，燒掉燒化祭㧯祭壇頂个油。人民一看到就全部歡喜到大聲嘶，伏在地上。