Judges 8
1 以法蓮人對基甸講：「你去攻打米甸人个時，做麼介毋喊𠊎等？你做麼介恁樣對待𠊎等？」佢等大聲責備基甸。
2 基甸㧯佢等講：「𠊎所做到个比毋得你等所做个；你等以法蓮人所拈到个葡萄比𠊎等亞比以謝人个上等葡萄還較好呢！
3 上帝將米甸人个領袖俄立㧯西伊伯交在你等手中；𠊎所做个樣做得㧯你等比呢？」佢等聽到基甸這話就無再發譴了。
4 基甸㧯跈佢个三百個人來到約旦河，過河个時，雖然佢等全部當𤸁，還係繼續追殺敵人。
5 佢等到疏割，基甸對城肚个人講：「請拿兜餅仔給跈𠊎个人食，因為佢等當𤸁。𠊎還愛去追殺米甸王西巴㧯撒慕拿。」
6 總係疏割个領袖講：「𠊎等樣愛拿餅仔給你个軍隊？你還吂捉到西巴㧯撒慕拿！」
7 基甸講：「好！上主將西巴㧯撒慕拿交給𠊎以後，𠊎愛拿曠野个竻仔來打傷你等。」
8 基甸向前行，來到比努伊勒，向該位个人提出共樣个要求。該位个人所應个㧯疏割人共樣。
9 所以基甸對比努伊勒个人講：「𠊎會平平安安倒轉來；該時，𠊎愛拆掉這座城堡！」
10 該時，西巴㧯撒慕拿並佢等个軍隊在加各。歸隻東方个遊牧民族只賸到一萬五千個士兵，已經有十二萬人戰死。
11 基甸對挪巴㧯約比哈東片、對遊牧民族个道路前進；米甸个軍隊完全無防備，基甸一下仔就打贏佢等。
12 米甸人个兩個王—西巴㧯撒慕拿走掉去；基甸追佢等，將佢等捉到，使佢等全軍四散。
13 約阿施个孻仔基甸對戰場轉來，經過希列斯山个路口，
14 捉到一個疏割个後生人，審問佢。佢將疏割領袖㧯長老个名單寫給基甸，總共七十七個人。
15 基甸到疏割，對城肚个人講：「還記得你等識拒絕幫助𠊎麼？你等講𠊎無捉到西巴㧯撒慕拿，所以毋將餅仔給𠊎當𤸁个軍隊。這下你等看！佢兩儕在這位！」
16 所以基甸將疏割个領袖捉起來，用曠野个竻仔刑罰佢等。
17 佢也拆掉比努伊勒个城堡，㓾掉城肚个人。
18 基甸審問西巴㧯撒慕拿：「你等在他泊山㓾死个人係麼介樣仔？」佢等應講：「佢等當像你，逐儕全部像王子。」
19 基甸講：「佢等係𠊎个兄弟，㧯𠊎共阿姆𫱔个。𠊎識指等永生个上主發誓，若係你等無㓾掉佢等，𠊎就毋㓾你等。」
20 所以基甸對佢大个孻仔益帖講：「去將佢等㓾掉！」總係益帖盡驚，無挷出刀，因為佢還係一個細阿哥仔。
21 西巴㧯撒慕拿對基甸講：「你親身來㓾𠊎等啊！你正有這力量。」所以基甸㓾掉佢等，將佢等駱駝頸項月型个妝飾品拿走。
22 後來，以色列人民對基甸講：「請做𠊎等个統治者；你㧯你个子孫全部做𠊎等个統治者，因為你救𠊎等脫離米甸人。」
23 基甸講：「𠊎毋做你等个統治者；𠊎个孻仔也毋做你等个統治者。上主愛統治你等。」
24 佢又講：「𠊎只要求你等一件事，請將你等逐儕所搶來个耳環交給𠊎。」(原來米甸人像其他以實瑪利人共樣，全部戴金耳環。)
25 民眾應講：「𠊎等當願意給你。」佢等就攤開一領外衫，逐個人將搶來个耳環㧒落去。
26 基甸收集大約二十公斤重个金耳環，另外還有米甸王戴个妝飾品、脖鍊㧯紫色衫褲，並駱駝頸項个鍊仔。
27 基甸用這兜金仔做一個偶像，放在佢个家鄉俄弗拉。後來所有个以色列人離開上帝、行姦淫，到該位去拜該偶像；這就成做基甸㧯佢屋下人个陷阱。
28 恁樣，米甸人被以色列人打輸了，擎頭毋起。國內太平四十年，直到基甸過身。
29 約阿施个孻仔基甸轉故鄉，住在屋下。
30 基甸有七十個孻仔，因為佢有當多𡜵娘㧯細姐。
31 佢在示劍有一個細姐；姖也𫱔一個孻仔，基甸㧯佢安名亞比米勒。
32 約阿施个孻仔基甸盡長命正過身，葬在亞比以謝族个俄弗拉，厥爸約阿施个墳墓。
33 基甸一過身，以色列人又離開上帝、行姦淫，去拜該兜巴力。佢等認巴力‧彼利土做佢等个神明。
34 以色列人無紀念上主—佢等个上帝，就係救佢等離開四周圍仇敵个上帝。
35 佢等乜無因為耶路‧巴力—就係基甸—為以色列人所做个好事來好款待佢屋下个人。