1基甸个孻仔亞比米勒到示劍；佢該兜母舅住在該位。佢要求母舅㧯佢姐公全家个人講：
2「請你等問示劍人：『你等愛麼人來治理你等？基甸所有个七十個孻仔呢？抑係一個人呢？』愛記得，𠊎—亞比米勒係你等个骨肉哦！」
3佢該兜母舅就代佢去問示劍人；示劍人決定跈亞比米勒，因為佢等講：「佢係𠊎等个兄弟。」
4佢等對巴力‧彼利土个廟肚拿出七十隻銀幣給亞比米勒；佢用這錢請一群鱸鰻仔來跈佢。
5佢轉到俄弗拉厥爸屋下，在一垤大石頭頂將基甸个七十個孻仔，就係佢該兜兄弟，全部㓾掉。總係基甸最細个孻仔約坦囥起來，無被人㓾死。
6所有个示劍人㧯米羅人聯合起來，在示劍該頭聖橡樹邊，立亞比米勒做王。
7約坦一聽到這事就到基利心山，企在山頂，大聲向佢等喊講：「示劍人啊！你等聽𠊎講，上帝正會聽你等个祈求！
8頭擺，森林肚个樹仔愛立一個王。佢等對橄欖樹講：『請你做𠊎等个王。』
9橄欖樹應講：『𠊎敢做得停止生產服事神明㧯供給人个橄欖油、去統治你等麼？』
10樹仔對無花果樹講：『請你做𠊎等个王。』
11無花果樹應講：『𠊎敢做得停止結甘甜个果子、去統治你等麼？』
12樹仔對葡萄樹講：『請你做𠊎等个王。』
13葡萄樹應講：『𠊎敢做得停止使神明㧯人歡喜个酒、去統治你等麼？』
14所有个樹仔對竻仔講：『請你做𠊎等个王。』
15竻仔應講：『若係你等誠心愛立𠊎做你等个王，就來偎靠𠊎个庇蔭，𠊎會保護你等；若無，有火會對竻仔出來，將黎巴嫩个香柏樹燒淨淨。』」
16約坦繼續講：「這下，你等正經誠心誠意立亞比米勒做王係麼？你等敢毋係應當紀念基甸，照佢个功勞好款待佢屋下个人？
17你等毋記得吾爸帶領你等相㓾，拚生拚死解救你等離開米甸人，係麼？
18無想到，今晡日你等竟然悖逆吾爸个家族；你等在一垤大石頭頂㓾掉佢七十個孻仔。因為佢奴婢个孻仔亞比米勒係你等个兄弟，你等就立佢做示劍王。
19你等今晡日若係正經誠心誠意愛恁樣款待基甸㧯厥屋下人，𠊎祝福你等㧯亞比米勒彼此因為對方得到快樂；
20若毋係恁樣，願亞比米勒放火燒淨示劍人㧯米羅人，也願示劍人㧯米羅人放火燒掉亞比米勒。」
21約坦因為驚厥哥亞比米勒，就逃走，來到比珥，住在該位。
22亞比米勒統治以色列三年。
23後來上帝使亞比米勒㧯示劍人有冤仇，示劍人就悖逆亞比米勒。
24這就係愛報應亞比米勒㧯幫助佢㓾死基甸七十個孻仔个示劍人。
25示劍人派人在逐隻山頂埋伏，愛㓾亞比米勒。佢等搶所有經過這條路个人。有人將這事㧯亞比米勒講。
26以別个孻仔迦勒㧯佢該兜兄弟來到示劍；示劍人全部信任佢。
27佢等到葡萄園摘葡萄、焗酒、辦筵席。佢等去到佢等个神廟，在該位又食又啉，咒罵亞比米勒。
28以別个孻仔迦勒講：「𠊎等示劍人係麼介人？做麼介愛服事亞比米勒？佢算麼介？佢係基甸个孻仔定定！佢个助手敢毋係西布勒。𠊎等做麼介愛服事佢呢？愛忠心服事示劍个阿爸哈抹个後代！
29希望這人民俾𠊎來帶領！𠊎就會除掉亞比米勒！𠊎會㧯佢講：『加派兜軍隊，出來相㓾啊！』」
30示劍城个領袖西布勒聽到以別个孻仔迦勒个話，非常發譴。
31佢派使者到亞魯瑪向亞比米勒報告：「以別个孻仔迦勒㧯佢个兄弟來到示劍，煽動城肚个人反對你。
32所以，你愛在暗晡時帶領部下埋伏在城外，
33天光朝晨，天一光你就來攻打這城。迦勒㧯佢个群眾出來相㓾个時，你愛盡全力攻打佢！」
34所以，亞比米勒在暗晡時帶領部下，分做四隊，埋伏在示劍城外。
35亞比米勒㧯佢个部下一看到迦勒出來，企在城門口，佢等就對埋伏个地方出來。
36迦勒看到，就對西布勒講：「你看，有人對山頂下來了！」西布勒應講：「你看毋著了；你將山个陰影看做人！」
37迦勒又講：「你看，有人對山中央下來；另外有一隊對『卜卦个橡樹』該條路過來！」
38西布勒對佢講：「你以前敢毋係歕雞頦講：『亞比米勒係麼人？𠊎等樣愛服事佢？』這兜人就係你所看輕个。這下，你出去相㓾啊！」
39所以迦勒帶領示劍人出去㧯亞比米勒相㓾。
40亞比米勒追打迦勒，迦勒就逃走；受傷橫落去个人當多，透路直到城門。
41亞比米勒住在亞魯瑪。西布勒將迦勒㧯佢該兜兄弟全部逐出示劍，毋准佢等再住在該位。
42第二日，亞比米勒發現示劍人計劃徙到城外，
43佢就將部下分做三隊，埋伏在城外。佢一看到民眾離開城肚，就對埋伏个地方出來㓾佢等。
44亞比米勒帶領一隊部下衝過去看守城門；另外兩隊衝到城外，㓾掉城外个民眾。
45亞比米勒歸日攻打城，最後將城打下，㓾掉城肚个人民，拆掉該城，又委鹽在地上。
46在示劍城堡底背个領袖聽到這事，就囥入伊勒‧彼利土廟个地窿肚。
47有人將這事㧯亞比米勒講，
48佢就帶部下到撒們山去。亞比米勒拿一支斧頭剁一枝大樹桍，擎在肩頭頂，佢也喊部下趕緊照等做。
49所以逐個人剁一枝大樹枝，跈亞比米勒，將樹枝堆在地窿周圍。佢等放火燒地窿，示劍城堡个人全部燒死掉，男女約有一千人。
50接等，亞比米勒到提備斯圍攻，佔領這城。
51城中有一座堅固个塔；城肚所有个人，無論男女，全部逃入塔肚。佢等將門關好，走到塔頂。
52亞比米勒攻打這塔，行近門口愛放火燒塔。
53有一個婦人家㧹一垤大磨石，打到亞比米勒个頭那，打爛佢个頭那殼；
54佢趕緊喊該代佢拿武器个後生人來，對佢講：「刀仔挷出來㓾𠊎啊！𠊎無愛被人講𠊎係被一個婦人家㓾死个。」所以該後生人用刀仔刺穿亞比米勒，佢就死掉。
55以色列人看到亞比米勒死掉，就全部轉去自家个所在。
56恁樣，上帝報應亞比米勒對厥爸所做个壞事，因為佢㓾掉自家个兄弟七十個人。
57上帝也使示劍人為自家个罪惡受盡痛苦；基甸个孻仔約坦咒罵佢等个話歸到佢等身上了。