Judges 20
1 以色列人民，對北部个但到南部个別是巴，東到基列地，全部同心來到米斯巴，聚集在上主面前。
2 以色列逐支族个領袖全部出席這擺上帝子民个聚會。擎刀仔个步兵有四十萬人。
3 同時，便雅憫人也聽講所有个以色列人全部集合在米斯巴。以色列人問：「㧯𠊎等講，這種邪惡个事樣般會發生？」
4 該利未人，就係受害婦人家个老公，應講：「𠊎㧯𠊎个細姐到便雅憫境內个基比亞過夜；
5 該暗晡基比亞人來包圍屋仔，愛捉𠊎、㓾𠊎，又將𠊎个細姐強姦到死掉。
6 𠊎將姖个屍體剁做一垤一垤，送到以色列十二支族，一支族一垤。基比亞人在𠊎等當中做恁積惡、恁淫亂个事。
7 你等全部係以色列人；這下你等愛樣般處理這件事呢？」
8 所有个人全部共下企起來講：「𠊎等連一儕也毋轉帳篷、毋轉屋肚去。
9 這下𠊎等愛恁樣做：𠊎等愛抽籤選兜人去攻打基比亞。
10 以色列逐支族十分之一个人愛負責運軍糧，其他个人愛去報復便雅憫个基比亞，因為佢等在以色列當中犯到恁積惡个罪。」
11 所以所有个以色列人同心一意，聚集攻打該城。
12 以色列逐支族派使者去問便雅憫支族个各家族，對佢等講：「你等當中樣會有人做恁邪惡个事！
13 這下將該兜基比亞个鱸鰻仔交出來，𠊎等愛將佢等處死刑，對以色列當中除掉這罪惡。」總係便雅憫人毋搭這兜以色列同胞；
14 佢等對便雅憫逐城來到基比亞，愛㧯這兜以色列人相㓾。
17 便雅憫支族以外个以色列人召集四十萬擎刀仔个、受過訓練个士兵。
18 以色列人到伯特利个聖所求問上帝：「㖠一支族愛帶頭去攻打便雅憫人呢？」上主講：「猶大支族。」
19 第二朝晨，以色列人出發，在基比亞附近安營。
20 佢等面對城个方向準備相㓾，愛攻打便雅憫軍隊。
21 便雅憫軍隊就對基比亞出來。該日，佢等㓾掉兩萬兩千個以色列士兵。
24 第二日佢等又攻打便雅憫軍隊。
25 便雅憫人又一擺對基比亞出來，㓾掉一萬八千擎刀仔个以色列士兵。
26 所有以色列人全部到伯特利，在上主面前坐等大噭，佢等禁食，一直到暗晡時。佢等在上主面前獻平安祭㧯燒化祭。
29 所以，以色列人安排士兵埋伏在基比亞四周圍。
30 第三日，佢等攻打便雅憫軍隊，像前兩擺共樣，面對基比亞个方向準備相㓾。
31 便雅憫人出來相㓾，被以色列人拐騙離開城。便雅憫人㧯頭擺共樣，在去伯特利㧯基比亞路上个曠野㓾掉以色列人，大約三十儕。
32 便雅憫人講：「𠊎等像以前共樣打贏佢等了。」總係，以色列人已經計劃好，用退兵來騙佢等離開城，到大路去。
33 所以，在以色列人个主力軍退轉巴力‧他瑪重新擺陣个時，另外埋伏在基比亞四周圍个人忽然走出來。
34 對全以色列選出个一萬勇士，到基比亞，攻打便雅憫人。戰爭激烈，便雅憫人還毋知佢等就會被以色列人消滅了。
35 上主將便雅憫軍隊交在以色列手中；該日，以色列人㓾掉便雅憫人兩萬五千一百儕，全部係擎刀仔个士兵。
36 便雅憫人正知自家輸掉了。先前，以色列軍隊个主力對便雅憫人面前假退兵，因為佢等靠該兜埋伏在基比亞四周圍个人。
37 這兜人盡遽衝入基比亞，分散在城肚，將城肚个人全部㓾掉。
38 以色列人个主力軍㧯埋伏个軍隊事前約定一個信號：佢等看到城肚火煙衝起來个時，
39 戰場上个以色列人就愛斡轉頭。這時，便雅憫人已經㓾掉三十個以色列人；佢等講：「𠊎等像以前共樣又打贏佢等了。」
40 後來，信號出現，城肚火煙衝起來，便雅憫人轉頭一看，發現全城火煙衝天。
41 以色列人个主力軍斡轉頭，便雅憫人就當著驚，因為佢等知自家會被以色列人消滅了。
42 佢等對以色列人面前轉身，向曠野逃走，總係走毋掉；佢等被以色列个主力軍㧯城肚出來个人夾在中間，被人㓾淨淨。
43 以色列人包圍便雅憫人，一直追佢等，直到基比亞東片个地方，透路盡㓾佢等。
44 便雅憫人大約有一萬八千精兵被人㓾死；
45 其他个人轉到曠野，向臨門个巖石逃走，有五千人在路上被以色列人㓾死。以色列人繼續追賸到个人，直到基頓，又㓾掉兩千人。
46 該日，便雅憫人總共有兩萬五千擎刀仔个勇士被以色列人㓾死。
47 向曠野逃走个便雅憫人有六百儕；佢等來到臨門个巖石，在該位住四隻月。
48 以色列人倒轉便雅憫地去，將各城个人㧯頭牲全部㓾淨淨，也將該地區所有个城鎮燒掉。