Judges 21
1 以色列人民在米斯巴集合个時，識向上主發誓講：「𠊎等絕對毋會將妹仔嫁給便雅憫人。」
2 這下，以色列人民到伯特利，坐在上帝面前直到暗晡時，大聲哀噭講：
3 「上主—以色列个上帝啊，樣般會有這種事發生呢？做麼介以色列會少掉便雅憫支族呢？」
4 第二日，人民打早䟘起來，在該位起一座祭壇，獻燒化祭㧯平安祭。
5 佢等互相問：「以色列逐支族中，有㖠兜人無到米斯巴上主面前集合？」(先前佢等識發誓：無到米斯巴上主面前去个人愛處死刑。)
6 以色列人民為佢等个同胞便雅憫人堵到絕種个危機，感覺當後悔，講：「今晡日以色列少掉一支族，
7 𠊎等愛樣般為賸到个便雅憫人尋𡜵娘呢？𠊎等已經向上主發誓毋將𠊎等个妹仔嫁給佢等。」
8 佢等又查問：「以色列逐支族中，有㖠兜人無到米斯巴上主面前集合？」結果發現基列地雅比城个人無一個來參加聚會；
9 軍隊點名个時，無一個雅比人在該位。
10 所以會眾派出一萬兩千名勇士，命令佢等：「到雅比去，將該位个人㓾淨淨，連婦女㧯細人仔全部㓾掉。
11 愛㓾死所有个男人，也㓾淨所有已經結婚个婦人家。」
12 佢等在雅比人當中尋到四百個後生人家女，將姖等帶到迦南个示羅營地。
13 然後，全會眾派人去見在臨門个巖石該兜便雅憫人，表示願意講和。
14 該時便雅憫人轉來，以色列人就將無受到災難个雅比个細妹仔給佢等做𡜵娘，總係還毋罅。
15 人民為到便雅憫人憂傷，因為上主使以色列眾支族缺掉一角。
16 會眾个長老講：「便雅憫支族無婦人家了，𠊎等應該樣般為該兜賸到个人尋𡜵娘呢？
17 以色列十二支族中做毋得絕掉一支族；𠊎等一定愛想辦法保存便雅憫支族。
18 總係𠊎等又做毋得俾佢等討𠊎等个妹仔，因為𠊎等已經發誓講，該將妹仔嫁給便雅憫人个一定會受咒詛。」
19 後來，佢等想：「一年一擺在示羅有上主个節期；這節期會到了。」(示羅在伯特利北片，利波拿南片，伯特利㧯示劍之間大路个東片。)
20 佢等吩咐便雅憫人講：「你等到葡萄園囥起來，
21 注意看。示羅个細妹仔在年會中出來跳舞个時，你等就對葡萄園出來，一儕搶一個做𡜵娘，帶姖轉便雅憫地區去。
22 若係姖等个阿爸㧯兄弟來尋𠊎等理論，𠊎等會㧯佢等講：『請看𠊎等个情面，施恩給該兜便雅憫人，因為𠊎等在戰場無留下細妹仔給佢等做𡜵娘。這下，也毋係你等將細妹仔嫁給佢等，所以你等乜無罪。』」
23 便雅憫人就照恁樣去做。佢等逐儕在示羅跳舞个細妹仔當中搶一個做𡜵娘，帶等走。佢等轉到自家个土地，重建城鎮，住在該位。
24 同時，其他以色列人也離開該位，逐儕轉自家个支族、家族㧯本地去了。
25 該時，以色列還吂有君王；逐儕照自家所歡喜个去做。