Joshua 9
1 以色列人民勝利个消息傳遍約旦河西片个山區、高原，㧯地中海海滣个平原，甚至遠到北片个黎巴嫩；也傳到赫人、亞摩利人、迦南人、比利洗人、希未人、耶布斯人這兜王个耳公中。
2 佢等就聯合起來，一心一意愛對抗約書亞㧯以色列人。
3 總係，住在基遍个希未人聽到約書亞樣般對待耶利哥㧯艾城，
4 就設計欺騙約書亞。佢等拿舊布袋㧯補過个皮酒袋裝食物，放在驢背頂，
5 膚身著舊衫褲，腳著補過个舊鞋，帶等硬掉又生菇个餅。
6 佢等來到吉甲營地去見約書亞㧯以色列人，講：「𠊎等係對當遠个地方來个，拜託㧯𠊎等立約！」
7 以色列人對這兜希未人講：「你等無定著就住在附近呢！𠊎等樣愛㧯你等立約？」
8 佢等對約書亞講：「𠊎等係來服事你等个。」約書亞問佢等：「你等係麼人？對㖠位來个？」
9 佢等就對約書亞講：「僕人對當遠个地方來，因為𠊎等聽到上主—你等上帝个聖名；佢在埃及所做个一切，
10 㧯佢對約旦河東片个兩個亞摩利王—希實本王西宏並住在亞斯他錄个巴珊王噩所做个一切，𠊎等全部有聽到了。
11 𠊎等个領袖㧯國內个人民喊𠊎等帶等路上愛食个東西來見你等，講：『𠊎等甘願服事你等，拜託㧯𠊎等立約！』
12 你看這兜餅，𠊎等出門愛來看你等个時還燒燒，這下全部硬掉，也生菇了。
13 𠊎等裝酒个時，酒袋還係新个，總係這下全部舊了。𠊎等个衫褲、鞋也全部因為行遠路爛掉了。」
14 以色列人拿兜佢等个食物，總係無去求問上主。
15 約書亞就㧯基遍人打和平个契約，答應毋㓾佢等。以色列該兜領袖也發誓遵守這條約。
16 契約打好三日，以色列人正知這兜人原來住在附近定定。
17 以色列人就去尋佢等；三日以後，到這兜人住个地方，就係基遍、基非拉、比錄、㧯基列‧耶琳。
18 總係以色列人毋敢㓾佢等，因為佢該兜領袖識指等上主—以色列上帝个名向這兜人發誓。為到這件事，會眾攏總怪怨該兜領袖。
19 總係該兜領袖對全會眾講：「𠊎等已經指等上主—以色列上帝个名向佢等發誓，這下𠊎等做毋得傷害佢等。
20 因為有這契約，𠊎等一定愛留佢等生命，若無，上帝會責罰𠊎等。」
21 該兜領袖繼續對會眾講：「愛留佢等个生命，佢等還做得為全會眾剖柴㧡水。」大家就接受該兜領袖个意見。
22 約書亞吩咐人將基遍人帶來，問佢等：「你等做麼介欺騙𠊎等？你等明明住在附近，做麼介講係對遠方來个呢？
23 因為欺騙𠊎等，上帝已經定你等个罪；你等愛永遠做奴才，為𠊎上帝个聖殿來剖柴㧡水。」
24 佢等應約書亞講：「僕人恁樣做係因為有人實在㧯𠊎等講，上主—你个上帝識指示佢个僕人摩西，愛將這垤土地全部賜給你等，喊你等在進入這垤土地个時，愛㓾淨所有个人。因為驚被你等㓾掉，𠊎等正騙你等。
25 這下𠊎等在你等个手中，由在你等愛樣般公當對待𠊎等！」
26 所以約書亞保護佢等，毋准以色列人㓾佢等；
27 總係佢同時也喊佢等做奴才，為會眾㧯上主个祭壇剖柴㧡水。直到今晡日，佢等還繼續在上主所選个所在做這種工作。