Joshua 10
1 耶路撒冷王亞多尼‧洗德聽講約書亞攻打並徹底毀滅艾城，㓾死艾城个王，像佢以前對待耶利哥㧯它个王共樣。佢又聽講基遍人㧯以色列人打和平个契約，這下住在佢等當中。
2 耶路撒冷人非常驚；因為基遍毋係細城，它㧯該兜有王个城差毋多大，比艾城還較大。基遍城个人又全部係勇士。
3 所以耶路撒冷王亞多尼‧洗德派人傳話給希伯崙王何咸、耶末王比蘭、拉吉王雅非亞，㧯伊磯倫王底璧，講：
4 「請來幫助𠊎攻打基遍，因為佢等同約書亞㧯以色列人打和平个契約。」
5 所以耶路撒冷王、希伯崙王、耶末王、拉吉王、㧯伊磯倫王，就係五個亞摩利王聯合起來，帶領軍隊，安營攻打基遍。
6 基遍人傳話給在吉甲營地个約書亞，講：「做毋得毋搭你个僕人，請遽遽上來幫助𠊎等！救𠊎等！所有住在山區个亞摩利王全部聯合起來攻打𠊎等了！」
7 所以約書亞帶領全部軍隊，包含最會相㓾个部隊，對吉甲上去。
8 上主對約書亞講：「毋使驚佢等；𠊎已經將佢等交在你手中了！佢等當中無人能抵抗你。」
9 約書亞帶領軍隊透夜對吉甲趕到基遍，忽然出現攻擊亞摩利人。
10 上主使亞摩利人一看到以色列軍隊就驚到亂淨淨。以色列人在基遍大贏佢等，追佢等到伯‧和崙个山崎，又向南一直追到亞西加㧯瑪基大，㓾死當多人。
11 當亞摩利人被以色列軍隊逐到伯‧和崙下崎个時，上主透路落大冰雹打佢等，直到亞西加。被冰雹打死个人比被以色列軍隊㓾死个還較多。
12 上主使以色列人打贏亞摩利人。該日，約書亞在以色列人面前向上主祈禱：「日頭啊，停在基遍个天頂高；月光啊，停在亞雅崙山壢頂。」
13 日頭就停下來，月光也無挺動，直到以色列打贏仇敵。這件事記載在《雅煞珥書》。日頭停在天頂大約一日，無照時落山。
14 上主聽人个祈禱，從來毋識有像恁樣个一日，因為上主為以色列戰爭！
15 事情結束後，約書亞帶領以色列軍隊轉吉甲營地。
16 五個亞摩利王逃走，囥在瑪基大个山窿肚。
17 有人發現佢等，就報給約書亞知佢等囥在山窿肚。
18 約書亞講：「碾幾垤大石頭過來，塞山窿口，派幾個人掌等。
19 總係你等毋好留在該位，愛繼續追敵人，去㓾背尾个部隊，毋好俾佢等走轉城肚！上主—你等个上帝已經將佢等交在你等手中了。」
20 約書亞㧯以色列人完全無留情、盡命㓾掉佢等，只有賸到少數幾個人逃入幾座堅固个城肚，無㓾掉。
21 然後，約書亞帶領个軍民全部平安轉到瑪基大个營地。對恁樣，無人敢開口反對以色列人。
22 約書亞講：「碾開山窿口个石頭！將該五個王帶出來見𠊎！」
23 佢等就碾開石頭，將該五個王，就係耶路撒冷王、希伯崙王、耶末王、拉吉王、㧯伊磯倫王帶到約書亞面前。
24 約書亞召集所有个以色列人來，吩咐該兜跈佢去相㓾个軍官，用腳踏在該五個王个頸筋，佢等就照恁樣做。
25 約書亞對該兜軍官講：「毋使驚佢等，毋好失志，愛堅強，愛勇敢，因為上主愛像恁樣打贏你等所有个仇敵。」
26 然後約書亞㓾掉該五個王，將佢等个屍體掛在五頭樹頂，直到臨暗仔。
27 日頭落山个時，約書亞下令將屍體解下來，㧒入佢等囥過个山窿肚，窿口用大石頭塞等。該兜石頭到這下還在該位。
28 該日，約書亞攻下瑪基大。佢㓾掉它个王㧯城肚所有个人，無留下一個。佢對待瑪基大王，像對待耶利哥王共樣。
29 接下去，約書亞㧯以色列軍隊對瑪基大去攻打立拿。
30 上主也將這城㧯它个王交在以色列人手中。佢等㓾掉城肚所有个人，無留一個。佢等對待立拿王，像對待耶利哥王共樣。
31 接等，約書亞帶領以色列軍隊離開立拿去圍攻拉吉。
32 在戰爭个第二日，上主將拉吉交在以色列人手中。佢等對待拉吉，像對待立拿共樣，也㓾掉城肚所有个人，無留一個。
33 該時，基色王何蘭來幫助拉吉，總係約書亞打贏佢，消滅佢个軍隊，無留一個人。
34 後來，約書亞帶領以色列軍隊離開拉吉去圍攻伊磯倫。
35 佢等當日就攻下該城，將該位个人㓾淨淨，像佢等在拉吉所做个共樣。
36 過後，約書亞帶領以色列軍隊離開伊磯倫上去希伯崙山區，圍攻希伯崙。
37 佢等攻下該城，㓾掉它个王㧯城肚所有个人，並周圍城鎮个人，無留一個。約書亞消滅這城，就像佢對待伊磯倫共樣，無留一個人。
38 最後，約書亞帶領以色列軍隊轉去攻打底璧，
39 佔領該城㧯附近所有个城鎮，將王㧯該位个人全部㓾死，無留一個。約書亞對待底璧㧯它个王，就像佢對待希伯崙㧯立拿，並立拿王共樣。
40 恁樣，約書亞征服歸隻地區。佢征服山區、東片个山排㧯西片个高原，還有南部个燥地。佢打贏這地區所有个王，㓾死所有个人民，無留一個。這係上主—以色列个上帝所命令个。
41 約書亞攻打敵人，對南片个加低斯‧巴尼亞到近海个迦薩，包含所有歌珊地區，向北直到基遍。
42 約書亞在一擺戰爭中征服這兜王㧯佢等个土地，因為上主—以色列个上帝為以色列戰爭。
43 戰爭結束後，約書亞帶領以色列軍隊轉去吉甲營地。