Bible

1 上主吩咐約書亞 2 對以色列人民講：「你等愛照𠊎喊摩西傳給你等个命令，指定幾座城做逃閃城。 3 該毋堵好、毋係有意害死人个，做得到該位去，逃避報血仇个人。 4 恁樣个人做得逃到其中个一座城，到城門口審判个地方，向該兜長老解釋事情个經過。佢等會俾佢入城肚，給佢地方好住，恁樣，佢做得留下來。 5 若係報血仇个人追到該位，城肚个長老做毋得將該人交出來，反轉愛保護佢；因為佢㧯死者無冤仇，毋係有意害死人个。 6 佢做得住在城肚，等候接受公開个審判，也愛等到當時个大祭司死掉，正做得轉到佢所逃避个家鄉。」 7 所以以色列人在約旦河西片拿弗他利山區个加利利指定基低斯，在以法蓮山區指定示劍，在猶大山區指定亞巴城(就係希伯崙)。 8 佢等又在約旦河東片，耶利哥東片个曠野高原，在呂便支族境內指定比悉，在迦得支族境內个基列指定拉末，在瑪拿西支族境內个巴珊指定哥蘭，來做逃閃城。 9 這兜逃閃城係為所有以色列人㧯暫時住在佢等當中个外族人設立个。凡毋係有意害死人个，全部做得到該位去請求保護，閃避報血仇个人。報血仇个人做毋得㓾佢，除非佢經過公開个審判。