Joshua 2
1 嫩个孻仔約書亞對什亭暗中派兩個探仔，吩咐講：「你等到迦南地去打探，特別調查耶利哥城个情況。」佢等去城肚，就到妓女喇合屋下過夜。
2 耶利哥王聽講該暗晡有以色列人來城肚打探，
3 就派人去對喇合講：「在你屋肚个人係來打探全地，你愛將佢等交出來！」
7 王派去搜查个人一離開耶利哥城，城門就關掉。該兜人去追兩個探仔，直到約旦河个渡船口。
8 兩個探仔還吂睡目以前，喇合上到屋頂，
9 對佢等講：「𠊎知上主已經將這土地賜給你等。這地方所有个人全部當驚你等，驚到會死。
10 𠊎等有聽講，你等離開埃及个時，上主樣般使你等面前个紅海燥掉；𠊎等也聽講，你等樣般對待約旦河東片个兩個亞摩利王—西宏㧯噩，將佢等毀滅。
11 𠊎等一聽到這兜事就著驚，逐儕一想到你等就無葛無煞，因為上主—你等个上帝係天頂人間个上帝。
12 這下，求你等指等上主對𠊎發誓，你等愛好款待𠊎全家人，親像𠊎好款待你等共樣。求你等給𠊎一個確實个保證。
13 求你等答應𠊎，你等愛饒赦𠊎个爺𡟓、兄弟、姊妹、並佢等家屬个性命，救𠊎等脫離死亡。」
14 該兩儕應講：「你毋好將𠊎等个祕密講出去，𠊎等就答應你。上主將這土地賜給𠊎等个時，𠊎等會誠心誠意好好款待你。若係𠊎等無信用，願上帝拿𠊎等个性命換你等个性命。」
15 喇合个屋起在城牆頂，所以姖用一條索仔將該兩儕對窗門縋下去。
16 姖對佢等講：「你等愛走到山肚去；若無，你等會被該兜愛捉你等个人尋到。你等愛在該位囥三日，等佢等轉來城肚以後正做得逃走。」
17 佢等對喇合講：「𠊎等照你个要求所發誓个，𠊎等一定會遵守，
18 總係你一定愛照𠊎等个話去做。𠊎等佔領你等土地个時，你愛將這條紅索仔䌈在你放𠊎等逃走个窗門頂。你愛將若爺𡟓、兄弟，㧯若爸全家全部聚集在你屋下。
19 若係有人行出這間屋，佢被人㓾死係自家个責任，毋係𠊎等个毋著；若係有人在你屋下受傷害，罪就歸給𠊎等。
20 若係你將𠊎等个祕密講出去，𠊎等就毋使遵守對你个發誓。」
21 喇合答應佢等个條件，然後將佢等送走。佢等離開以後，喇合將紅索仔䌈在窗門頂。
22 兩個探仔到山肚囥起來。王派去搜查个人在城外逐所在尋佢等，尋三日還係尋毋到，就轉耶利哥城去。
23 所以兩個探仔對山肚出來，過河去見嫩个孻仔約書亞，將經過个情形向佢報告。
24 佢等對約書亞講：「𠊎等確信上主已經將該地全部賜給𠊎等了。該位个人全部當驚𠊎等。」