Bible

1 以下係以色列人在約旦河西片迦南地分產業个情形。祭司以利亞撒㧯嫩个孻仔約書亞，並以色列各支族、該兜家族該兜領袖將土地分給人民。 2 佢等遵照上主給摩西个命令，抽籤決定將約旦河西片个土地分給九個半支族。 5 以色列人遵照上主給摩西个命令將土地分配好勢。 6 有一日，有兜猶大支族个人到吉甲去見約書亞。其中一儕名安到迦勒，係基尼洗人耶孚尼个孻仔。佢對約書亞講：「在加低斯‧巴尼亞个時，上主對神人摩西提到你㧯𠊎个事，你知這件事！ 7 𠊎四十歲个時，上主个僕人摩西派𠊎對加低斯‧巴尼亞來打探這地方；𠊎照實將所看到个向佢報告。 8 可惜，㧯𠊎共下去个人佢等个報告使人民大著驚；總係𠊎全心順服上主—𠊎个上帝。 9 該日，摩西就答應𠊎，講：『你个腳踏過个土地，一定會成做你㧯你个子孫永久个產業，因為你全心順服上主—𠊎个上帝。』 10 「看哪！上主向摩西講該兜話到這下，已經過四十五年。該時以色列人在曠野流浪，總係上主照佢个應許保守𠊎个生命。你看！𠊎已經八十五歲了。 11 今晡日𠊎還係恁健，就像當日摩西派𠊎出去个時共樣。𠊎還係恁有力，做得像頭擺恁樣出去相㓾。 12 這下，請你將上主應許愛給𠊎个山區交給𠊎。你識聽過，該地方有當大漢个亞衲族人，住在高高个城牆底背。若係上主㧯𠊎共下，𠊎就有法度將佢等逐出去，就像上主所應許个。」 13 約書亞就祝福耶孚尼个孻仔迦勒，將希伯崙城交給佢，做佢个產業。 14 所以希伯崙到這下還係屬基尼洗人耶孚尼个孻仔迦勒个後代，因為佢全心順服上主—以色列个上帝。 15 (在這以前，希伯崙安到亞巴城；亞巴係亞衲族中最強大个人物。)然後，該地方太平，全無戰爭。